აშშ-ის პრეზიდენტ დონალდ ტრამპს ირანში გამოსაყენებელი ფარული და სამხედრო ინსტრუმენტების ფართო სპექტრის შესახებ ინფორმაცია მიაწოდეს, - ამის შესახებ თავდაცვის უწყების ორმა ოფიციალურმა პირმა CBS News-ს განუცხადა.
წყაროების ცნობით, შორ მანძილზე მოქმედი რაკეტებით დარტყმები კვლავაც აშშ-ის პოტენციური ინტერვენციის ერთ-ერთ ვარიანტად რჩება, თუმცა პენტაგონის წარმომადგენლებმა ასევე წარმოადგინეს კიბეროპერაციები და ფსიქოლოგიური კამპანიის რეაგირების ვარიანტები.
წყაროებმა, რომლებმაც გამოცემასთან ანონიმურობის დაცვის პირობით ისაუბრეს, განაცხადეს, რომ ირანში აშშ-ის ნებისმიერი სამხედრო რეაგირება, სავარაუდოდ, საჰაერო ძალას მოიცავს, თუმცა დამგეგმავები ასევე განიხილავენ ირანის სამეთაურო სტრუქტურებისა და კომუნიკაციების ჩაშლის ვარიანტებს.
წყაროების ცნობით, სამშაბათს თეთრ სახლში ტრამპის ეროვნული უსაფრთხოების გუნდი შეხვედრას გამართავს, რათა ირანთან დაკავშირებული ვარიანტები განიხილონ, თუმცა უცნობია, დაესწრება თუ არა შეხვედრას თავად პრეზიდენტი.
ნორვეგიაში დაფუძნებული ადამიანის უფლებათა დამცველი ორგანიზაციის, „ირანის ადამიანის უფლებების“ (IHRNGO) ცნობით, ქვეყანაში სულ მცირე 648 მომიტინგე დაიღუპა, მათ შორის ცხრა 18 წლამდე ასაკის ადამიანი. ირანში მყოფმა წყაროებმა BBC-ის განუცხადეს, რომ დაღუპულთა რიცხვი შესაძლოა გაცილებით მეტი იყოს. BBC-ის და სხვა საერთაშორისო საინფორმაციო ორგანიზაციების უმეტესობას ირანის ტერიტორიიდან ინფორმაციის გავრცელების საშუალება არ აქვთ. ქვეყანაში ხუთშაბათს საღამოდან ინტერნეტი გათიშულია, რამაც ინფორმაციის მოპოვება და გადამოწმება გაართულა.
