ინფორმაცია, რომ უნგრეთის საგარეო საქმეთა მინისტრი ევროკავშირის სამიტების დროს რუსეთს ინფორმაციას აწვდიდა, არავისთვის არის მოულოდნელი, – ამის შესახებ პოლონეთის პრემიერ-მინისტრი დონალდ ტუსკი აცხადებს.
ტუსკის თქმით, დიდი ხანია, ამის შესახებ ეჭვები არსებობს.
„ის ამბავი, რომ ორბანის ხალხი მოსკოვს ევროკავშირის სამიტების შესახებ დეტალურად აწვდის ინფორმაციას, არავისთვის უნდა იყოს გასაკვირი. დიდი ხანია, ჩვენ ეჭვი გვაქვს. სწორედ ეს არის ერთ-ერთი მიზეზი, რის გამოც მე ვსაუბრობ მხოლოდ მაშინ, როცა ეს აუცილებელია და ზუსტად იმდენს, რამდენიც საჭიროა“, – წერს ტუსკი სოციალურ ქსელში.
პოლონეთის პრემიერ-მინისტრი ეხმაურება „ვაშინგტონ პოსტის“ მიერ გავრცელებულ ინფორმაციას, რომლის მიხედვითაც, უნგრეთის საგარეო საქმეთა მინისტრი პიტერ სიიარტო ევროკავშირის სამიტების შესვენებებზე რეგულარულად უკავშირდებოდა რუსეთის საგარეო საქმეთა მინისტრს, სერგეი ლავროვს და აწვდიდა „ცოცხალ ინფორმაციას“ მიმდინარე განხილვებზე. თავად სიიარტო ბრალდებებს უარყოფს და „ფეიკნიუსს“ უწოდებს.
