პეტერ მადიარმა უნგრეთის პრემიერ-მინისტრის თანამდებობა დაიკავა, - ინფორმაციას უნგრული მედია ავრცელებს.
უნგრეთის ახალმა პარლამენტმა საპარლამენტო არჩევნებში გამარჯვებული პარტია „ტისას“ ლიდერი, პეტერ მადიარი ქვეყნის პრემიერ-მინისტრის თანამდებობაზე დაამტკიცა.
პეტერ მადიარს მხარი 140-მა დეპუტატმა დაუჭირა, ხოლო 54-მა ხმა მის წინააღმდეგ მისცა.
მანამდე, უნგრელმა დეპუტატებმა პარლამენტის თავმჯდომარედ აგნეშ ფორსტოფერი აირჩიეს.
უნგრეთის პრემიერ-მინისტრმა პეტერ მადიარმა უნგრეთის პრეზიდენტს გადადგომისკენ მოუწოდა.
„მოვუწოდებ იმ ინსტიტუტების ლიდერებს, რომლებიც წინა სისტემის პოლიტიკური მსახურები იყვნენ, გამოიჩინონ გამბედაობა და 31 მაისამდე თანამდებობებიდან საკუთარი ნებით გადადგნენ. დაე, ეს ტომაშ შუიოკმა დაიწყოს!“, - განაცხადა უნგრეთის პრემიერ-მინისტრმა, პეტერ მადიარმა პარლამენტში ფიცის დადების შემდეგ სიტყვით გამოსვლისას.
მისი თქმით, პარტია „ტისას“ მთავრობა ყველა უნგრელის მთავრობა იქნება.„სამშობლო არა პრივილეგია, არამედ საერთო სახლია და სახელმწიფომ თითოეული ადამიანის მიმართ თანაბარი პასუხისმგებლობა უნდა გამოიჩინოს“, - აღნიშნა უნგრეთის პრემიერ-მინისტრმა.
უნგრეთის პარლამენტის ახალი თავმჯდომარის ერთ-ერთი პირველი გადაწყვეტილების თანახმად, პარლამენტის შენობაზე 2014 წლის შემდეგ პირველად, ევროკავშირის დროშა დააბრუნეს.
უნგრეთის ყოფილი პრემიერ-მინისტრი, ვიქტორ ორბანი პარლამენტის სხდომას არ დაესწრო.
