აქეთ მხარეს ყოფნა ნებისმიერ პატიმრობად ღირს, წერს სოციალურ ქსელში ჟურნალისტი ნანუკა ჟორჟოლიანი, რომელმაც სამდღიანი პატიმრობის შემდეგ იზოლატორი დატოვა.
"ჰაი, დავბრუნდი, ისევ ისე მიყვარხართ როგორც მიყვარდით :)) შეიძლება უფრო მეტადაც კი.
დანარჩენს მერე მოგიყვებით.
ეს რა სიგიჟე ხდება დიუშენის ბავშვებს, 300 ათასი ლარი შეუგროვეს სტუდენტებმა და მოქალაქეებმა.
აქეთ ეს საქართველო და იქეთ ქოცები. აქეთ მხარეს ყოფნა ნებისმიერ პატიმრობად ღირს", - წერს ჟორჟოლიანი.
შეგახსენებთ,
ჟურნალისტმა ნანუკა ჟორჟოლიანმა 3-დღიანი ადმინისტრაციული პატიმრობის შემდეგ, იზოლატორი დატოვა.
მას სასჯელაღსრულების დაწესებულებასთან ოჯახის წევრები, ახლობლები და მეგობრები დახვდნენ.
თბილისის საქალაქო სასამართლომ, ტელეწამყვანსა და „ნანუკას ფონდის” დამფუძნებელს, ნანუკა ჟორჟოლიანს 3- დღიანი ადმინისტრაციული პატიმრობა 19 მაისს შეუფარდა. ჟორჟოლიანი სასამართლო დარბაზშივე დააკავეს. შინაგან საქმეთა სამინისტრო, ნანუკა ჟორჟოლიანს 2025 წლის დეკემბრის თვეში, ადმინისტრაციულ სამართალდარღვევათა კოდექსის 174-ე პრიმა მუხლის პირველი ნაწილის დარღვევას ედავებოდა, რაც ტროტუარზე ქვეითთა გადაადგილების ხელოვნურ შეფერხებას გულისხმობს, რომელიც 2-დან 15 დღემდე ადმინისტრაციულ პატიმრობას ითვალისწინებს.
