ეუთო-ს საპარლამენტო ასამბლეა დღეს „ჰააგის დეკლარაციას“ მიიღებს, რომელიც საქართველოს შესახებ რეზოლუციას მოიცავს

ეუთო-ს საპარლამენტო ასამბლეა დღეს „ჰააგის დეკლარაციას“ მიიღებს, რომლის შემადგენელი ნაწილია საქართველოზე მომზადებული რეზოლუცია – „საქართველოში არჩევნების მთლიანობისა და ფუნდამენტური თავისუფლებების დაცვა“.

ეუთო-ს საპარლამენტო ასამბლეის ვებგვერდზე გამოქვეყნებული ინფორმაციით, რეზოლუციის მთავარი სპონსორია ამერიკელი კონგრესმენი, ჯო უილსონი.

რეზოლუციის პროექტი შეშფოთებას გამოხატავს საქართველოში 2024 წლის 26 ოქტომბრის საპარლამენტო არჩევნებთან დაკავშირებით და მიუთითებს ეუთო/ოდირის ანგარიშებში ასახულ მნიშვნელოვან დარღვევებზე. დოკუმენტი ასევე ეხება 2025 წლის ადგილობრივი არჩევნების დროს შესაძლო გაყალბების, ამომრჩეველთა მოსყიდვის, ე.წ. „კარუსელების“ და ოპოზიციონერი დამკვირვებლებისთვის ხელის შეშლის შესახებ გავრცელებულ ცნობებს.

რეზოლუცია გმობს „უცხოური გავლენის გამჭვირვალობის შესახებ“ კანონს, „შეკრებებისა და მანიფესტაციების შესახებ“ კანონში შეტანილ ცვლილებებსა და ადმინისტრაციულ სამართალდარღვევათა კოდექსში განხორციელებულ ცვლილებებს, რომლებიც, დოკუმენტის შეფასებით, ზღუდავს გაერთიანების, მედიის, გამოხატვისა და შეკრების თავისუფლებებს.

დოკუმენტში ასევე გამოთქმულია შეშფოთება ადმინისტრაციული რესურსების გამოყენებისა და ინსტიტუციური ძალაუფლების კონსოლიდაციის გამო, დაგმობილია ოპოზიციის წარმომადგენლების, ჟურნალისტებისა და მშვიდობიანი დემონსტრანტების თვითნებური დაკავებები და აღნიშნულია, რომ დემოკრატიული კონტროლისა და ბალანსის მექანიზმების შესუსტება საქართველოს ევროატლანტიკური ინტეგრაციის გზას საფრთხეს უქმნის.

რეზოლუციის პროექტით ეუთო-ს საპარლამენტო ასამბლეა საქართველოს ხელისუფლებას მოუწოდებს, გაათავისუფლოს ეროვნული და საერთაშორისო უფლებადამცველი ორგანიზაციების მიერ პოლიტიკურ პატიმრებად მიჩნეული პირები, გააუქმოს ფუნდამენტურ თავისუფლებებთან წინააღმდეგობაში მყოფი კანონმდებლობა, გამოიძიოს 2024 და 2025 წლების არჩევნებთან დაკავშირებული დარღვევები, გაატაროს სასამართლოსა და ცენტრალური საარჩევნო კომისიის დამოუკიდებლობის უზრუნველმყოფი რეფორმები და შექმნას უსაფრთხო გარემო სამოქალაქო საზოგადოებისა და დამოუკიდებელი მედიის საქმიანობისთვის.

ამასთან, დოკუმენტი ეუთო-ს საპარლამენტო ასამბლეის წევრებსა და საერთაშორისო საზოგადოებას მოუწოდებს, გააგრძელონ საქართველოს ხელისუფლებასთან მუშაობა დემოკრატიული ნორმების აღდგენის მიზნით, არ აღიარონ ისეთი არჩევნების შედეგები, რომლებიც სანდო საერთაშორისო და ადგილობრივი სადამკვირვებლო მისიების მიერ თავისუფალ და სამართლიან არჩევნებად არ იქნება შეფასებული, და გააგრძელონ საქართველოში ადამიანის უფლებებისა და დემოკრატიული პროცესების მონიტორინგი.

ცნობისთვის, ეუთო-ს საპარლამენტო ასამბლეის 33-ე ყოველწლიური სესია 4 ივლისს დაიწყო და დღეს დასრულდება.