გამოცემა The Wall Street Journal ოფიციალურ წყაროზე დაყრდნობით აცხადებს, რომ აშშ 300-ზე მეტი რუსი დეპუტატისთვის სანქციებს ამზადებს. გამოცემის ინფორმაციით, დამატებითი სანქციების შესახებ პრეზიდენტი ბაიდენი ხუთშაბათს განაცხადებს.
გამოცემა იუწყება, რომ პრეზიდენტი ბაიდენი რუსეთის სახელმწიფო დუმას 300 წევრისთვის დაწესებულ სანქციებს ხუთშაბათს, ევროპაში ვიზიტისას განაცხადებს.
The Wall Street Journal-ის ინფორმაციით, სანქციების ახალი პაკეტი 400 ინდივიდს შეეხება, მათგან 328 რუსეთის საკანონმდებლო ორგანოს დეპუტატი, დანარჩენი კი რუსული ელიტის წარმომადგენელია.
რუსეთისთვის დაწესებული დამატებით სანქციებს აშშ-ის პრეზიდენტი ევროკავშირთან და დიდი შვიდეულის ქვეყნებთან ერთად გამოაცხადებს.
დაგეგმილი ვიზიტის ფარგლებში ბაიდენი NATO-ს მოკავშირეებს შეხვდება და ერთობლივად განიხილავენ მომდევნო ნაბიჯებს.
რუსეთის ფედერალური ასამბლეა 450 დეპუტატს მოიცავს, ზედა პალატაში, ფედერაციულ საბჭოში კი 170 დეპუტატია.
მიუხედავად იმისა, რომ დუმას ბევრად ნაკლები ძალაუფლება აქვს ვიდრე რუსეთის პრეზიდენტს, მისი უფლებამოსილება ბოლო წლებში გაფართოვდა, განსაკუთრებით ეკონომიკის კუთხით.
თავად პუტინს და მისი ხელისუფლების არაერთ წარმომადგენელს სანქციები უკვე დაუწესდათ.
აღსანიშნავია, რომ 15 თებერვალს უკრაინაში შეჭრამდე სწორედ დუმამ მიმართა პრეზიდენტ პუტინს სეპარატისტული დონეცკისა და ლუგანსკის რეგიონების დამოუკიდებლობის აღიარების თხოვნით.
ასევე აღსანიშნავია, რომ უკრაინაში შეჭრის შემდეგ, 4 მარტს რუსეთის სახელმწიფო დუმამ მიიღო კანონპროექტი, რომლის მიხედვითაც „უკრაინაში რუსეთის სპეციალური ოპერაციის შესახებ მცდარ ინფორმაციის გავრცელება" სისხლის სამართლის დანაშაულად მიიჩნევა. ეს კანონი 15 წლამდე პატიმრობას ითვალისწინებს.
