საერთაშორისო ოლიმპიურმა კომიტეტმა (სოკ), ტოკიოს ოლიმპიადის საორგანიზაციო კომიტეტმა, ასევე ტოკიოსა და იაპონიის მთავრობებმა გამართეს ონლაინშეკრება, სადაც მიიღეს გადაწყვეტილება, რომ კორონავირუსის პანდემიის გამო, ზაფხულის ოლიმპიურ თამაშებზე უცხოელი გულშემატკივრები არ დაუშვან. ხოლო მათ, ვისაც უკვე შეძენილი აქვთ ბილეთები, თანხა უკან დაუბრუნდებათ.
ამის მიზეზად სახელდება ის, რომ ამ მომენტისთვის, COVID-19-თან დაკავშირებით იაპონიაში სიტუაცია მეტად რთულია, გაჩნდა სხვადასხვა შტამი და საერთაშორისო დონეზე მოგზაურობა მკაცრად შეზღუდულია.
არადა, იაპონია გულშემატკივრების გარეშე 1.37 მილიარდ დოლარს დაკარგავს.
ტოკიოს ოლიმპიადა 2021 წლის 23 ივლისიდან 8 აგვისტომდე გაიმართება.
ცნობილი ხდება სპორტსმენთა ქცევის წესები და შეზღუდვები:
იაპონიაში შესვლამდე 72 საათით ადრე აღებული უარყოფითი PCR-ტესტი, ჯერჯერობით ერთადერთი აუცილებელი პირობაა სპორტსმენებისთვის. თუმცა, საერთაშორისო ოლიმპიური კომიტეტის ბოლო დოკუმენტებში არის მკაცრი რეკომენდაცია თამაშებამდე ვაქცინაციის შესახებ;
ოლიმპიური სოფლიდან გასვლა აკრძალულია. გამონაკლი დაშვება მოხდება მხოლოდ სპეციალური ნებართვით;
სპორტსმენებსა და ოფიციალურ პირებს აკრძალული აქვთ სპორტის სხვა სახეობების შეჯიბრებებზე დასწრება;
სპორტსმენს არ შეუძლია ოლიმპიურ სოფელში შესვლა თავისი სტარტიდან არაუგვიანეს ხუთი დღისა, ხოლო სოფელი უნდა დატოვოს შეჯიბრების დასრულებიდან 48 საათის განმავლობაში.
