ჩვენ უნდა გამოვაცხადოთ მკაცრი სანქციების ახალი ტალღა. რეალობა არის ის, რომ ფული დასავლეთიდან კვლავ მიედინება პუტინის ომის მანქანაში და ეს უნდა შეჩერდეს, – ამის შესახებ დიდი ბრიტანეთის საგარეო საქმეთა მდივანმა, ლიზ ტრასმა ვარშავაში უკრაინელ კოლეგასთან ერთობლივ პრესკონფერენციაზე განაცხადა.
მისი თქმით, ძალიან ცხადია, რომ რუსეთის შეიარაღებულმა ძალებმა უკრაინაში მშვიდობიანი მოსახლეობის წინააღმდეგ სამხედრო დანაშაულები ჩაიდინეს.
„ჩვენ, ყველა შეძრულები ვართ ბუჩაში მომხდარით, სასაკლაო, სექსუალური დანაშაულის მკაფიოდ მტკიცებულება, უდანაშაულო მოქალაქეების სამიზნეში ამოღება, ძალიან ცხადია, რომ ადგილი ჰქონდა სამხედრო დანაშაულებს. ჩვენ ვმუშაობთ სისხლის სამართლის საერთაშორისო სასამართლოსთან, ჩვენ გამოვყოფთ სახსრებს, პოლიცია იძიებს ამ დანაშაულებს, რათა დამნაშავეებმა პასუხი აგონ სასამართლოს წინაშე. რაც შეეხება გენოციდის საკითხს, ეს სასამართლომ უნდა განსაზღვროს. თუმცა, მინდა ძალიან მკაფიოდ ვთქვა, რომ დიდ ბრიტანეთს აქვს მაქსიმალური მიდგომა სანქციებთან დაკავშირებით. პუტინი უნდა დამარცხდეს უკრაინაში. მოგვიანებით, მიმდინარე კვირაში დიდი შვიდეულისა და ნატო-ს საგარეო საქმეთა მინისტრების შეხვედრა გაიმართება. ჩვენ უნდა გამოვაცხადოთ მკაცრი სანქციების ახალი ტალღა. რეალობა არის ის, რომ ფული დასავლეთიდან კვლავ მიედინება პუტინის ომის მანქანაში და ეს უნდა შეჩერდეს“, – განაცხადა ტრასმა.
ლიზ ტრასმა ასევე განაცხადა, რომ ვიდრე რუსეთის ძალები უკრაინის ტერიტორიაზე რჩებიან, სანქციების მოხსნაზე ლაპარაკი არ უნდა იყოს.
