საქართველოს საგარეო საქმეთა სამინისტრო დონეცკის ოლქის ქალაქ კრამატორსკში, რკინიგზის სადგურზე რუსეთის ძალების მიერ სარაკეტო დარტყმებს ეხმაურება.
როგორც უწყების მიერ სოციალური ქსელით გავრცელებულ ტექსტშია აღნიშნული, საგარეო საქმეთა სამინისტრო მკაცრად გმობს მორიგ სასტიკ თავდასხმას უდანაშაულო ხალხის წინააღმდეგ.
საგარეო საქმეთა სამინისტროში აცხადებენ, რომ უკრაინის გვერდით დგანან.
„აბსოლუტურად გამანადგურებელია იმის ნახვა, როგორ ახორციელებს რუსეთი დარტყმას კრამატორსკის რკინიგზის სადგურზე, რომელიც მოქალაქეების ევაკუაციისთვის გამოიყენებოდა. ჩვენ მკაცრად ვგმობთ მორიგ სასტიკ თავდასხმას უდანაშაულო ხალხის წინააღმდეგ. ჩვენ უკრაინის გვერდით ვდგავართ", - აცხადებენ საგარეო საქმეთა სამინისტროში.
ცნობისთვის, დონეცკის ოლქის ქალაქ კრამატორსკში, რკინიგზის სადგურზე რუსეთის ძალებმა სარაკეტო დარტყმები განახორციელეს. ბოლო მონაცემებით, იერიშის შედეგად დაიღუპა 50 ადამიანი, მათ შორის ხუთი ბავშვია.
