ფრაქცია „ქართული ოცნების“ თავმჯდომარე მამუკა მდინარაძე აცხადებს, რომ დეტალების მოგვარების შემდეგ, საპარლამენტო უმრავლესობის წარმომადგენლები უკრაინაში ჩასასვლელად მზად არიან.
„საპარლამენტო უმრავლესობაში როდესაც ეს საკითხი გავიარეთ, ვიმსჯელეთ და საპარლამენტო უმრავლესობა მზად არის, დღესვე, ხვალვე, როცა საჭირო იქნება, როცა პროტოკოლურად შეთანხმდება ეს საკითხი და ფიზიკურად დალაგდება წასვლის თემა, შეგვიძლია, საპარლამენტო უმრავლესობის შემადგენლობიდან რამდენიმე ადამიანი წავიდეს უკრაინაში და გამოთქვას დამატებით კიდევ ერთხელ სამძიმარი“, – განაცხადა მამუკა მდინარაძემ.
ამასთან, მდინარაძემ კომენტარი გააკეთა პარლამენტის თავმჯდომარის, შალვა პაპუაშვილის წერილზე, რომელზეც მდინარაძემ აღნიშნა, რომ წერილში მოტანილ არც ერთ საკითხთან დაკავშირებით საქართველოს ხელისუფლებას პასუხი არ მიუღია.
„რაც შეეხება პარლამენტის თავმჯდომარის ვიზიტს, მოგეხსენებათ, რომ დამატებითი პოლიტიკური დატვირთვის მატარებელია და მან რამდენიმე დღის წინ გამოაქვეყნა წერილი, რომელშიც მოტანილ არც ერთ საკითხთან, კითხვასთან, თხოვნასთან, თუნდაც მოთხოვნასთან დაკავშირებით ჯერჯერობით პასუხი არ მიგვიღია. სამწუხაროდ, დღემდე არ მიგვიღია პასუხი ჩვენი მეგობარი ქვეყნის ხელისუფლებისგან, რატომ დაგვაბრალეს გადაუმოწმებლად და უაპელაციოდ, თითქოს საქართველო ამ კონკრეტულ მოცემულობაში რძესთან და ყველთან დაკავშირებით მოლაპარაკებებს აწარმოებდა რუსეთთან, რატომ დაგვაბრალეს ბოლო დროს ისეთი ამორალური რამ, რასაც იარაღის კონტრაბანდა ჰქვია. რატომ გაიწვიეს ელჩი მაშინ, როდესაც საქართველოს მხარდაჭერა უპრეცედენტოა. დღესაც ნახეთ ახალი ამბავი, რომ უკრაინის ფოსტის გავლით საქართველოსნაირი დახმარება არავის გაუწევია უკრაინისთვის, მაგრამ ეს პირობითად მეორეხარისხოვან თემად ჩავთვალოთ, რადგან საქართველო ყველა საერთაშორისო პლატფორმაზე უპრეცედენტო, შეძლების მაქსიმუმის ზღვარზე მხარდაჭერას უწევს უკრაინას. ამ ყველაფერზე ჩვენ პასუხი ჯერ არ მიგვიღია და ამაზე იქნება დამოკიდებული საქართველოს პარლამენტის თავმჯდომარის ვიზიტი. მას ასევე არ აქვს პრობლემა ამასთან დაკავშირებით“, – განაცხადა მამუკა მდინარაძემ.
