"მაშინ, როცა ქვეყანაში 9 მილიონი ტურისტი იყო შემოსული, ლარი ორჯერ გაუფასურდა ნაკლებტურისტიან პერიოდთან შედარებით. ტურისტების გამუდმებით ხსენება ფასებთან და ინფლაციასთან დაკავშირებით ნიშნავს მთავრობისა და ეროვნული ბანკის ყველა შეცდომის პანდემიაზე გადაბრალებას",- აცხადებს პოლიტიკოსი და სებ-ის ყოფილი თავმჯდომარე რომან გოცირიძე რეფინანსირების განაკვეთის გაზრდასთან დაკავშირებით.
გოცირიძის აზრით, სებ-ის გადაწყვეტილებებს აზრი არ აქვს იმ შემთხვევაში, თუ განაგრძობს კომერციულ ბანკებზე, ფაქტობრივად, შეუზღუდავი ოდენობით სესხების გაცემას.
"ეროვნულმა ბანკმა დღეს რეფინანსირების სესხების განაკვეთი ერთი პროცენტით აწია და იგი 9,5 პროცენტი გახდა. სხვა გამოსავალი არც ჰქონდა, ოღონდ ამის გაკეთებას რა აზრი აქვს, თუ მეორე ხელით კვლავ განაგრძო კომერციულ ბანკებზე ფაქტობრივად შეუზღუდავი ოდენობით სესხების გაცემა. ბანკებს რა ენაღვლებათ, გაუძვირა ეროვნულმა ბანკმა ფული? გაუძვირებს კლიენტებს სესხს"- აღნიშნავ გოცირიძე.
შეგახსენებთ: 2021 წლის 28 აპრილს საქართველოს ეროვნული ბანკის მონეტარული პოლიტიკის კომიტეტმა რეფინანსირების განაკვეთის 1 პროცენტული პუნქტით გაზრდის გადაწყვეტილება მიიღო. მონეტარული პოლიტიკის განაკვეთი 9.50-ით განისაზღვრა.
