სომხეთის რესპუბლიკის განსაკუთრებულ დავალებათა ელჩმა ედმონ მარუკიანმა, აზერბაიჯანთან სამშვიდობო შეთანხმების დაწყებასთან დაკავშირებით ექვსი პუნქტისგან შემდგარი შეთავაზება გაასაჯაროვა. ამის შესახებ სომხური მედია იტყობინება.
რაც შეეხება პუნქტებს, ისინი შემდეგია:
1. ოფიციალურმა ერევანმა აზერბაიჯანიდან ხელშეკრულების თაობაზე წინადადება მიიღო, რომელსაც ისინი პასუხობენ;
2. სომხეთის რესპუბლიკას არასდროს ჰქონია და არ აქვს ტერიტორიული პრეტენზია აზერბაიჯანის მიმართ;
3. სომხური მხარისთვის ფუნდამენტური მნიშვნელობა აქვს მთიანი ყარაბაღის სომხების უსაფრთხოების უზრუნველყოფის, მათი უფლებებისა და თავისუფლებების დაცვის, ასევე მთიანი ყარაბაღის საბოლოო სტატუსის განსაზღვრის საკითხებს;
4. სომხური მხარე მნიშვნელოვნად მიიჩნევს აზერბაიჯანის რესპუბლიკის პრეზიდენტის, სომხეთის რესპუბლიკის პრემიერ-მინისტრის და რუსეთის ფედერაციის პრეზიდენტის 9 ნოემბრის, 11 იანვრისა და 26 ნოემბრის განცხადებებში გათვალისწინებული ვალდებულებების შესრულებას (სამხედრო ტყვეების დაბრუნება, გზების განბლოკვა);
5. სომხური მხარე მზადაა, დაიწყოს მოლაპარაკებები სამშვიდობო შეთანხმებაზე აზერბაიჯანსა და სომხეთს შორის სახელმწიფოთაშორისი ურთიერთობების დამყარების შესახებ გაერო-ს წესდების, ჰელსინკის დასკვნითი აქტისა და საერთაშორისო სამოქალაქო-პოლიტიკური პაქტის საფუძველზე;
6. შესაბამისი მოლაპარაკებების ორგანიზებისთვის სომხურმა მხარემ ეუთო-ს „მინსკის ჯგუფის“ თანათავმჯდომარეებს მიმართა.
