„ვაზილ ჰუდაკი იმუშავებს უცხოური ინვესტიციების მიმართულებით. კორონავირუსით გამოწვეულ რთულ ვითარებაში ეკონომიკის აღდგენის ახალ გეგმაზე ვმუშაობთ. ამ გეგმაში საქართველოს სამომავლო ეკონომიკური განვითარებისთვის უცხოურ ივესტიციებს წამყვანი როლი აქვს. ქვეყანას სჭირდება ინვესტიციები და ეს ნიშნავს ეკონომიკის სწრაფ აღდგენას, მეტ შემოსავალს ჩვენი მოქალაქეებისთვის და დასაქმებას. ჩვენ შევარჩიეთ ბატონი ვაზილი, ის მუშაობდა ევროპის საინვესტიციო ბანკის ვიცე-პრეზიდენტად, იყო სლოვაკეთის ეკონომიკის მინისტრი და ფინანსთა მინისტრი. მისი მთავარი მიზანი იქნება ქვეყანაში უცხოური და კერძო სექტორებიდან მხარდაჭერის მობილიზება",- განაცხადა პრემიერმა ირაკლი ღარიბაშვილმა დღეს, 7 მაისს, უცხოური ინვესტიციების მოზიდვის მიმართულებით სპეციალური მრჩევლის წარდგენისას.
ჰუდაკის განცხადებით, ქვეყნის განვითარებისათვის ინვესტიციების მოზიდვა და კერძო სექტორთან თანამშრომლობა აუცილებელია.
"ჩვენ რთულ პერიოდში გვიწევს მუშაობა, მაგრამ მიმაჩნია, რომ განვითარების შესაძლებლობა არსებობს. აშშ-სა და ევროკავშირიდან ინვესტიციების მოზიდვა აუცილებელია, სწორედ ეს არის საქართველოს მომავალი. გამოიყო 50 მილიარდი ევრო ამ პროგრამისთვის. გამოიყო ორი ძირითადი ასპექტი: გაციფროვნება და კლიმატის ცვლილების დაძლევა. მიმჩნია, რომ საქართველო კიდევ უფრო დაუახლოვდება ევროპას. შევისწავლე სხვადასხვა გამოწვევა და საჭიროება. სახელმწიფო რესურსები არ არის საკმარისი და ამიტომ მობილიზება აუცილებელია. ჩაერთვება კერძო სექტორიც. დიდი პატივი მაქვს ამ დარგში ვიმსახური პრემიერ მინისტრის მრჩევლად და ამ მისიას ძალიან სერიოზულად ვუდგები",- განაცხადა ჰუდაკმა.
შეგახსენებთ: საქართველოს პრემიერს უცხოური ინვესტიციების მოზიდვის მიმართულებით სპეციალური მრჩევლი აქამდე არ ჰყოლია.
