რამდენიმე წუთის წინ, თბილისის საქალაქო სასამართლომ ენმ-ს თავმჯდომარე, ნიკა მელია პატიმრობიდან გირაოს სანაცვლოდ გაათავისუფლა.
სასამართლო სხდომის დაწყებამდე, მელიას საქმის პროკურორმა, ამირან გულუაშვილმა განაცხადა, პატიმრობა ბრალდების მხარის თვითმიზანი არასდროს ყოფილა.
„ჩვენ შეთავაზების შესაბამისად გუშინ მივმართეთ თბილისის საქალაქო სასამართლოს შუამდგომლობით. შუამდგომლობით მოთხოვნილია ნიკა მელიას პატიმრობის შეცვლა გირაოთი. კერძოდ, გირაო 40 000 ლარის ოდენობით ფიგურირებს ჩვენს შუამდგომლობაში.
ჩვენ არაერთხელ აღვნიშნეთ, რომ ნიკა მელიას პატიმრობა ჩვენი თვითმიზანი არასდროს ყოფილა. ამასთან, ერთ მნიშვნელოვან გარემოებაზე მინდა ყურადღების გამახვილება, 25 თებერვლის შეთავაზების შემდგომ არაერთხელ მოისმინეთ ადვოკატებისგან, ასევე ბრალდებულისგან, რომ პროკურატურის შეთავაზება სამართლებრივ მოცემულობას არ შეესაბამება, თუმცა 8 მაისს ყველამ ნახეთ, რომ ეს არა თუ შესაბამისობაშია საქართველოს კანონმდებლობასთან, ძალიან მარტივად განხორციელებადი იყო ტექნიკურად", - განაცხადა გულუაშვილმა.
შეგახსენებთ,: „ნაციონალური მოძრაობის" თავმჯდომარის, ნიკა მელიას გირაოს თანხა ევროკავშირმა 8 მაისს გადაიხადა.
