,,როდესაც საუბარია სასამართლო რეფორმაზე, მითითებულია, რომ სასამართლო რეფორმა უნდა განხორციელდეს 2022 წლის გაზაფხულის ჩათვლით. ბუნებრივია, როდესაც საუბარი ეხება დანიშვნებს, ძალიან რთულია, დაელოდო ერთწლიან პერიოდს, აქედან გამომდინარე, ჩვენ გადავხედავთ ყველაფერს, მაგრამ გადაწყვეტილება იქნება მიღებული ისე, როგორც ეს არის საჭირო სასამართლო სისტემის დამოუკიდებლობისთვის," - ასე პასუხობს მმართველი პარტიის თავმჯდომარე ირაკლი კობახიძე ევროკავშირის და ამერიკის შეერთებული შტატების ელჩების წერილს, რომელიც მათ პარლამენტის თავმჯდომარე კახა კუჭავას გაუგზავნეს და რომელშიც სასამართლო რეფორმაზეა საუბარი.
,,შეთანხმების სულისკვეთება დაცული იქნება, თუ ცვლილებები მიიღება იუსტიციის უმაღლესი საბჭოს ახალი წევრების დანიშვნამდე და სანამ დაიწყება კანდიდატებისთვის ხმის მიცემა. მართლაც, დანიშვნის პროცესში დაუყოვნებლივი პაუზა აჩვენებს ერთგულებას იმ საქმისადმი, რომელიც მართლმსაჯულების გამჭვირვალობასა და მის მიმართ ნდობის გაზრდას ისახავს მიზნად. ჩვენი მხრივ, მზად ვართ გაგიწიოთ საერთაშორისო დონის რჩევები და დახმარება, როგორც ეს გათვალისწინებულია შეთანხმებაში. მათ შორის იმ საკითხში, რაც შეეხება დანიშნული მოსამართლეების მიუკერძოებლობას,"- ნათქვამია ელჩების წერილში.
