უკრაინის აღდგენის საერთაშორისო კონფერენციამ ლუგანოში, შვეიცარიაში მიიღო იმ პრინციპების სერია, რომელიც უკრაინას გრძელვადიანად დაეხმარება ხელახალ აღმშენებლობასა და რუსეთთან ომისგან მიღებული ზიანის აღდგენაში.
2-დღიან კონფერენციას 40-ზე მეტი ქვეყნის ლიდერი და საერთაშორისო ორგანიზაციები ესწრებოდნენ.
მიღებული დეკლარაცია გრძელვადიან ეკონომიკურ, ტექნოლოგიურ დახმარებას მოიცავს, „რომელიც უკრაინას მოამზადებს ომის შემდგომი პერიოდისთვის, მაშინ როცა ომი კვლავ მძვინვარებს“ - განაცხადა შვეიცარიის კონფედერაციის პრეზიდენტმა და საგარეო საქმეთა ფედერალური დეპარტამენტის ხელმძღვანელმა, იგნაციო კასისმა.
„ლუგანოში ჩვენ დავიწყეთ უკრაინის აღდგენის პროცესი საერთაშორისო დონეზე და გავწერეთ პრინციპები, რომლებიც აღდგენას უდებს საფუძველს“ - თქვა კასისმა.
მისი თქმით, ეს პრინციპები აღდგენასა და რეფორმებს მოიცავს და გამჭვირვალობის, პარტნიორობისა და თანასწორობის პრინციპებს ეყრდნობა.
„ამან უკრაინელ ხალხს უნდა მისცეს იმედი და რწმენა, რომ ისინი არ არიან მარტო, რადგან უკრაინის მდგრადი აღდგენა მოითხოვს გამოცოცხლებულ, გამძლე და განახლებულ ინსტიტუციებს, რომლებიც მომავლისთვის შესაფერისი იქნება“ - განაცხადა მან.
