როცა მმართველი პარტია აცხადებს, რომ 12-ვე პუნქტს პირნათლად შეასრულებს, ჩემთვის მნიშვნელოვანია ვიცოდე, როგორ აპირებენ ამის შესრულებას. ჯერ არ მინახავს დოკუმენტი, სადაც იქნება დაწერილი, რას როგორ აპირებენ. აქედან გამომდინარე, აუცილებლად დავესწრები შალვა პაპუაშვილთან დანიშნულ შეხვედრას და მოვისმენ, რა ხედვა აქვთ, – ამის შესახებ პარლამენტის ვიცე-სპიკერმა, ლევან იოსელიანმა განაცხადა.
მისი თქმით, „ვინმე თუ ხელს ითბობს და ბედნიერია იმით, რაც დღეს საქართველოში ხდება, ეს არის რუსეთის ფედერაცია“.
„მაინტერესებს კონკრეტული დოკუმენტი, კანონმდებლობა, რას როგორ აპირებენ, როგორ აგვარებენ პრობლემას სასამართლოში, პოლიციაში, პროკურატურაში, ადამიანის უფლებათა კუთხით და ასე შემდეგ. ოპოზიციის დიდი ნაწილის უბრალოდ არ მესმის, რომელიც გაუთავებლად საუბრობენ რაღაცის განუხორციელობლობაზე და ფოკუსი აბსოლუტურად სხვა მიმართულებით გადაააქვთ. იმის მაგივრად, რომ იმ დავალების შესრულებაზე ვფოკუსირდეთ, რაც მოცემული აქვს ქვეყანას, აბსოლუტურად უშინაარსო თემებზე ვსაუბრიბთ, რომელსაც პოლიტიკასთან კავშირი არ აქვს. პოლარიზაციის პრობლემის ერთ-ერთი გზაა ხელისუფლებამ და ოპოზიციამ ერთმანეთის მედიებში დაიწყოს სიარული და გაიხსნას სივრცე დებატებისთვის. როდესაც ადამიანები ერთმანეთთან საუბრობენ, მეტია შეთანხმების შანსი, ვიდრე მაშინ, როცა ერთმანეთს ბრიფინგებით ელაპარაკებიან. ამიტომ, ორივე მხარემ უნდა მიიღოს გადაწყვეტილება, ერთმანეთს ეთერებში დაუძახოს და ცივილიზებული, ევროპული დებატები გამართოს. თუ ვინმე ხელს ითბობს და ბედნიერია იმით, რაც დღეს საქართველოში ხდება, ეს არის რუსეთის ფედერაცია, რომელსაც აწყობს საქართველოს ევროკავშირის გზაზე ჰქონდეს დაბრკოლებები და ეს დაბრკოლებები შიდა დაპირისპირებით იყოს გამოწვეული“, – განაცხადა იოსელიანმა.
