როდესაც არასამთავრობო ორგანიზაცია აცხადებს და ითხოვს, რომ მან მიიღოს მონაწილეობა და ჰქონდეს გადამწყვეტი სიტყვა მთავრობის დაკომპლექტებაში, ეს უკვე არის პოლიტიკური განაცხადი, ამიტომ, ზოგადად, ყველა არასამთავრობო ორგანიზაცია, რომლებიც ამ პროცესში იყვნენ ჩართულნი და პრეტენზიას აცხადებდნენ ხელისუფლებაში მოსვლაზე, დაფიქრდნენ ამ კუთხით, თავისი მოთხოვნები უკან მიაქვთ თუ არა, – ამის შესახებ პარლამენტის თავმჯდომარემ, შალვა პაპუაშვილმა განაცხადა.
მისი თქმით, სამწუხაროდ, არასამთავრობო ორგანიზაციების ნაწილი პოლიტიკურ პარტიას ემსგავსება.
ამასთან, შალვა პაპუაშვილის განცხადებით, პარლამენტში სასამართლო სისტემის რეფორმასთან დაკავშირებით გამართულ დღევანდელ შეხვედრაზე, სამოქალაქო სექტორის წარმომადგენლები იმყოფებოდნენ, რაც უფრო ფართო ცნებაა, ვიდრე მხოლოდ არასამთავრობო ორგანიზაცია.
„რაც შეეხება სამოქალაქო სექტორის ჩართვას და ამას ჩვენ ხაზს ვუსვამთ, რადგან სამოქალაქო სექტორი უფრო ფართო ცნებაა, ვიდრე არასამთავრობო ორგანიზაციები. დღეს, მაგალითად, ამ შეხვედრაზე რომ აკადემიური სფეროს წარმომადგენლები იყვნენ, ადასტურებს, რამდენად მნიშვნელოვანია, რომ არ ვიყოთ ფოკუსირებული მხოლოდ ცალკეულ პროექტებზე თუ არასამთავრობო ორგანიზაციებზე, არამედ სამოქალაქო სექტორის უფრო ფართო ჩართულობაზე. მე შეხვედრა მქონდა აღმოსავლეთ პარტნიორობის სამოქალაქო პლატფორმასთან, რომელიც აერთიანებს თითქმის ყველა არასამთავრობო ორგანიზაციას საქართველოში. გვქონდა მათთან საუბარი, როგორ ჩაერთვებიან მათი წარმომადგენლები ამ პროცესში.
ზოგიერთ არასამთავრობო ორგანიზაციას რაც შეეხება, მათ შორის მათ, რომლებსაც გუშინაც ჰქონდათ საჯარო მიმართვა, ვნახეთ, რომ ამ ხელმომწერებიდან რამდენიმე მანამდე ტექნიკური მთავრობის დაკომპლექტებაში მონაწილეობის მოთხოვნით გამოდიოდა, ეს არის სწორედ ის ზღვარი, რომლის იქითაც არის პოლიტიკური დღის წესრიგი და არა სამოქალაქო საზოგადოების წარმომადგენლობა. როდესაც არასამთავრობო ორგანიზაცია აცხადებს და ითხოვს, რომ მან მიიღოს მონაწილეობა და ჰქონდეს გადამწყვეტი სიტყვა მთავრობის დაკომპლექტებაში, ეს უკვე არის პოლიტიკური განაცხადი. ამიტომ, ზოგადად, ყველა არასამთავრობო ორგანიზაცია, რომლებიც ამ პროცესში იყვნენ ჩართულნი და პრეტენზიას აცხადებდნენ ხელისუფლებაში მოსვლაზე, დაფიქრდნენ ამ კუთხით, თავისი მოთხოვნები უკან მიაქვთ თუ არა. ჩვენ უნდა ვიცოდეთ, ვინ ზის მაგიდის გარშემო, ეს არის პოლიტიკური პარტია თუ არასამთავრობო ორგანიზაცია. სამწუხაროდ, ის პროცესები, რაც ჩვენ ბოლო პერიოდში გვქონდა, რამდენიმე ორგანიზაციამ თავისი თავის დისკრედიტირება გააკეთა ამ კუთხით, როდესაც პირდაპირ პოლიტიკური დღის წესრიგის განმახორციელებელი გახდა“, – განაცხადა პაპუაშვილმა.
