30 წელია, სწორედ ამერიკული „აირაი“ და „ენდიაი“ დგანან გაყალბებული არჩევნების სათავეებთან, განსაკუთრებით ალერგია აქვთ „ლეიბორისტული პარტიის“ წინააღმდეგ, – წერს სოციალურ ქსელში პარტიის ლიდერი შალვა ნათელაშვილი.
„ლეიბორისტული პარტიის“ ლიდერის თქმით, სწორედ ეს ორგანიზაციები უწყობენ ხელს ანტიამერიკულ განწყობებს მოსახლეობაში.
„დიდ საიდუმლოს არ გაგიმხელთ, თუ გაგახსენებთ, რომ სწორედ ამერიკული ე.წ. აირაი და ენდიაი დგანან 30 წელია გაყალბებული არჩევნების სათავეებთან. მათ დაადასტურეს, გაათეთრეს და გაალეგიტიმურეს ყველა გაყალბებული არჩევნები საქართველოში 1995 წლიდან. განსაკუთრებით ალერგია აქვთ ლეიბორისტული პარტიის წინააღმდეგ – 68 პროცენტი რომ გვქონდა რეიტინგი, მაშინაც მაქსიმუმ ერთ პროცენტს გვიწერდნენ. დღესაც მორიგი პასკვილი გამოაცხო ენდიაიმ, სადაც ლეიბორისტული პარტია ნახსენებიც არაა, სამაგიეროდ მცირე, მაგრამ თურმე რაღაც კატეგორია თავის იდეებთან ახლოს მდგომად მიიჩნევს ანაბრების ქურდ ჩხარტიშვილის შექმნილ ე.წ. აღმაშენებელს და ახალგაზრდების თვალთდამთხრელი გახარიას პარტიას. ვაი, სირცხვილო. სწორედ თქვენ ქმნით და ხელს უწყობთ ანტიამერიკულ განწყობებს მოსახლეობაში და სწორედ ამით სარგებლობს რუსი ოლიგარქის რეჟიმი, როდესაც თავზე გამხობთ ყველაფერს, რომელსაც სხვათა შორის ასევე გაუთეთრეთ ამ ათი წლის მანძილზე ყველა ურცხვად გაყალბებული არჩევნები და რომლის შეტევებისგან ბოლოს მაინც ჩვენი დასაცავი ხდებით. აი, ასე ნადგურდება ქვეყნის მომავალი და ამგვარად იფლანგება მეგობარი ამერიკელი ხალხისგან აკრეფილი გადასახადები განკუთვნილი ჩვენს დასახმარებლად“, – წერს შალვა ნათელაშვილი.
