მაია სანდუ - ევროპული პოლიტიკური გაერთიანება არის პლატფორმა, რომელმაც უნდა განამტკიცოს ჩვენი კოლექტიური ნდობა და სოლიდარობა

ეს არის მოგზაურობა უფრო ფართო ევროპისკენ, რომელიც დღეს წამოვიწყეთ, – ამის შესახებ მოლდოვის პრეზიდენტმა, მაია სანდუმ პრაღაში, ევროპული პოლიტიკური გაერთიანების პირველი შეხვედრის შემდეგ გამართულ პრესკონფერენციაზე განაცხადა.

„ევროპული პოლიტიკური გაერთიანება ჩვენთვის არის პლატფორმა, რომელმაც უნდა განამტკიცოს ჩვენი კოლექტიური ნდობა და სოლიდარობა. ამ გაერთიანებას ვაყალიბებთ რთულ დროს და მთავარი ამოცანა გახლავთ ერთობლივი მოქმედება, რათა მდგრადი მშვიდობა და საერთაშორისო ნორმების პატივისცემა აღდგეს ყველგან ევროპის კონტინენტზე, ჩვენი საზღვრები და ხალხი დაცული უნდა იყოს. ეს რჩება მთავარ პრიორიტეტად”, -განაცხადა მოლდოვის პრეზიდენტმა.

მისივე თქმით, მშვიდობის მიღწევა მხოლოდ ერთობლივი მოქმედებით და სოლიდარობის გამოვლენით არის შესაძლებელი.

„ეს იწყება უკრაინის დახმარებით, რათა მან ტერიტორიული მთლიანობის აღდგენა შეძლოს საერთაშორისოდ აღიარებულ საზღვრებში. ჩვენ ერთიანები ვართ რუსეთის აგრესიისა და მისი ტერიტორიების არალეგალური ანექსიის დაგმობაში. ჩვენ ერთიანები ვართ უკრაინის დახმარების ვალდებულებაში, რომ მან შეძლოს სუვერენიტეტის დაცვა. ამასთან, მეტი ძალისხმევაა საჭირო, რომ ევროპის უსაფრთხოება იყოს დაცული საშუალოვადიან და გრძელვადიან პერსპექტივაში. ენერგოუსაფრთხოება და ენერგიის ხელმისაწვდომობა იყო კიდევ ერთი საკითხი, რომელზეც ვისაუბრეთ. ჩვენ არ უნდა დავუშვათ, რომ ენერგოკრიზისმა შეარყიოს ჩვენი დემოკრატია. ჩვენ ერთად გადავლახავთ ამ გამოწვევას. ზამთარს გადავიტანთ და ევროპა გაცილებით ძლიერი გამოვა ამ კრიზისიდან”,-განაცხადა მოლდოვის პრეზიდენტმა.