საქართველოში 15 იანვრიდან ქარი ჩადგება და 20 იანვრამდე უმეტესად უნალექო ამინდია მოსალოდნელი.
როგორც გარემოს ეროვნულ სააგენტოში აცხადებენ, 15-დან 20 იანვრამდე პერიოდში, დღისით, დაბლობ რაიონებში ჰაერის ტემპერატურა +11, +16 გრადუსამდე მოიმატებს.
ამასთან, დღეს, 14 იანვარს დასავლეთ საქართველოში შენარჩუნებული იქნება უნალექო და ქარიანი ამინდი, თუმცა ქარის სიჩქარე ნელ-ნელა დაიკლებს და აღარ იქნება გრიგალის კატეგორიის, რომელიც ბოლო სამი დღე ფიქსირდებოდა დასავლეთ საქართველოს უმეტეს რეგიონში.
სინოპტიკოსების პროგნოზით, აღმოსავლეთ საქართველოში დღეიდან 20 იანვრამდე უმეტესად უნალექო ამინდი იქნება. ამასთან, 17 იანვრამდე ღამის საათებში გაძლიერდება ყინვა, 17 იანვრიდან კი, ყინვა შესუსტდება და დღის ტემპერატურაც +4, +9 გრადუსამდე მოიმატებს.
რაც შეეხება დედაქალაქს, გარემოს ეროვნული სააგენტოს ცნობით, დღეიდან 20 იანვრამდე თბილისში უნალექო ამინდია მოსალოდნელი. ჰაერის ტემპერატურა ღამის საათებში -3, -5 გრადუსის ფარგლებში დაფიქსირდება, დღისით კი +7, +9 გრადუსამდე მოიმატებს.
