საქართველოს ყოფილი პრეზიდენტის, მიხეილ სააკაშვილის სასამართლო პროცესზე მოწმისთვის შეტყობინების მიწერის გამო ცენტრ „ემპათიის“ ხელმძღვანელი მარიამ ჯიშკარიანი სხდომიდან გააძევეს.
მოსამართლემ მარიამ ჯიშკრიანს რამდენჯერმე მიმართა, რომ მობილური ტელეფონი შეენახა.
„ქალბატონო მარიამ, ტელეფონი ხელს გიშლით და შეინახეთ“, – მიმართა მოსამართლე გიორგი არევაძემ ჯიშკარიანს, რის შემდეგაც მოწმეს, გალინა კამუშინას, რომელიც სხდომაზე იკითხება, ტელეფონის შენახვისკენ მოუწოდა. „ხომ მშვიდობაა, ტელეფონში ხშირ-ხშირად იყურებით. შეინახეთ. ქალბატონო გალინა, ბოლო მომენტში რა მოგწერათ მარიამ ჯიშკარიანმა?“ – მიმართა მოსამართლემ მოწმეს.
ტელეფონის განმეორებით გამოყენების შემდეგ მოსამართლემ მარიამ ჯიშკარიანს სხდომათა დარბაზის დატოვებისკენ მოუწოდა და აღნიშნა, რომ ის არღვევდა წესრიგს.
„ქალბატონო მარიამ, გაძევებული ხართ სხდომის დარბაზიდან წესრიგის დარღვევის გამო და კიდევ იმის გამო, რომ სხვა ექსპერტს კარნახობთ, რა უპასუხოს მხარეების შეკითხვებს. ეს კიდევ უფრო ცუდი საქციელია, ვიდრე წესრიგის დარღვევა“, – მიმართა მოსამართლემ მარიამ ჯიშკარიანს.
ჯიშკარიანმა მოსამართლეს უპასუხა: „გეტყვით, რა ვუთხარი, მე გახლდით ექსპერტიზის ხელმძღვანელი“.
ამასთან, დარბაზიდან გამოსვლის შემდეგ მარიამ ჯიშკარიანმა ჟურნალისტებს განუცხადა, მოსამართლემ არაკანონიერი გადაწყვეტილება მიიღო.
„კომისიური ექსპერტიზის დროს ექსპერტები ერთად მუშაობენ. მე უკვე გამოკითხული ვარ, შესაბამისად, მაქვს უფლება, ვიჯდე დარბაზში და არავის არაფერს არ ვკარნახობდი. რაც შეეხება სასამართლო პროცესს და მოსამართლის გადაწყვეტილებას, ეს გახლავთ არაკანონიერი გადაწყვეტილება. მოსამართლე არევაძეს ეტყობა, ჩემი ძალიან ეშინია და ეშინია ჩვენი საერთო დასკვნის. შესაბამისად, მიიღო ასეთი გადაწყვეტილება, რომ მე არასოდეს დავესწრო ამ სასამართლოს ან მეორეჯერ არ მოვიდე მოწმედ. მოსამართლის მხრიდან ეს არის პრევენციული ზომა.
პენიტენციური სამსახური ექსპერტს გამოკითხვისას მისი კომპეტენციის ფარგლებს გარეთ აძლევს შეკითხვებს და სწორედ ამას მოჰყვა ჩემი კომენტარი. ამაზე ხმამაღლადაც განვუცხადე მოსამართლეს, რომ ექსპერტიზის ხელმძღვანელი გახლდით მე. თუკი საჭირო იყო ნიმუშების აღებისას ხელმოწერა, მაგალითად, თმისა და ფრჩხილის აღებისას, სხვა წევრი ვერ მოაწერდა, მე უნდა მომეწერა და ჩვენ ამ დროს არ შეგვიშვეს. ეს ძალიან კარგად იცის მოსამართლემ. მე ამის თაობაზე ჩვენება მივეცი. შესაბამისად, შეკითხვები, რასაც ახლა პენიტენციური სამსახური უსვამს ჩვენს ექსპერტს, გასულია მისი კომპეტენციის ფარგლებიდან“, – აღნიშნა მარიამ ჯიშკარიანმა.
