საქართველოს მესამე პრეზიდენტი მიხეილ სააკაშვილი IRI-ის კვლევას ეხმაურება და აცხადებს, რომ საქართველოში მოქალაქეებს საზოგადოებრივი აზრის კვლევებში საკუთარი რეალური პოზიციის დაფიქსირების ეშინიათ. მისი თქმით, ამ გარემოების გათვალისწინების გარეშე კვლევის შედეგების შეფასება რეალურ საზოგადოებრივ განწყობებს ვერ ასახავს.
„ტყვედ ჩავარდნის წინ, კიევში შევხვდი IPSOS საზოგადოებრივი კვლევის, უდიდესი ევროპული კომპანიის რეგიონულ დირექტორს. მან მითხრა, რომ საქართველოში საზოგადოებრივი აზრის კვლევის ჩატარება ურთულესია, ვინაიდან ხალხს ზუსტად ისევე ეშინია, როგორც რუსეთის მიერ ოკუპირებულ ყირიმში და დონეცკში და რომ პირდაპირ კითხვის დასმა უაზრობაა და ირიბი კითხვებით უნდა დაადგინო ნამდვილი განწყობა.
ასეთი იყო სიმართლე მასობრივ რეპრესიებამდე, ხალხის ციხეში ჩაყრამდე და ქუჩებში ხალხის ტერორამდე და ახლა როგორ ეშინია ხალხს კვლევებში სიმართლის თქმის, ხომ წარმოგიდგენიათ! და 46%-დან, რომელმაც უარი თქვა პასუხის გაცემაზე, რამდენია იგივე „ნაცმოძრაობის“ მხარეს? და ვინც თქვა, „ოცნებას“ ვაძლევ ხმასო, რამდენი ოჯახის წევრია ა(ა)იპ-ის და სსიპ-ის თანამშრომელი, ან რამდენს უბრალოდ ეშინია სიმართლის თქმა.
და ბოლოსდაბოლოს, აქეთ-იქით გაიხედეთ, თქვენს გარშემო რამდენი ადამიანი დარჩა „ქოცების“ მხარდამჭერი?! ხოდა შეწყვიტეთ მოთქმა და ქოთქოთი და იფიქრეთ იმაზე, მე რომ საქართველოში თავისუფლად დავდიოდე, რამდენ ხანში დავასრულებდი ამათ“, – წერს მიხეილ სააკაშვილი.
