მგონია, რომ შიგნით უნდა ვიპოვოთ ძალა, რომ მიხეილ სააკაშვილის საკითხი სხვანაირად მოვაგვაროთ, რადგან მეტი საგარეო ზეწოლა რაღა უნდა წამოვიდეს, რაც აქამდე იყო. ეს შიდა პროცესია და შიგნით უნდა იყოს კონსენსუსი, – ამის შესახებ პარტია „გირჩის“ წევრმა, იაგო ხვიჩიამ განაცხადა.
დეპუტატს კითხვა დაუსვეს მიხეილ სააკაშვილთან დაკავშირებით რეზოლუციასთან დაკავშირებით, რომლის კენჭისყრაც ევროპარლამენტში ხვალ იგეგმება.
„საქართველოდან უფრო მეტი ჩანს, ვიდრე ეს შეიძლება, ევროპიდან დაინახონ. შეიძლება, ამ რეზოლუციაში იყოს სიმართლის მარცვალიც, მაგრამ ასევეა ბევრი არაზუსტი. მგონია, რომ მიხეილ სააკაშვილის საკითხი სხვანაირად უნდა გადაწყდეს და ჩვენ შიგნით უნდა ვიპოვოთ ძალა, რომ ეს სხვანაირად მოვაგვაროთ, რადგან მეტი საგარეო ზეწოლა რაღა უნდა წამოვიდეს, რაც აქამდე იყო. მგონია, რომ ეს შიდა პროცესია და შიგნით უნდა იყოს კონსენსუსი, რანაირი იქნება და სად იქნება გადაკვეთის წერტილები, ჯერ არ იკვეთება. ზოგადად, ციხეში ჯდომა წამების ერთ-ერთი ნაირსახეობაა. სააკაშვილი ციხეში ზის და როცა ამბობს, რომ ციხეში აწამებენ, მესმის, რას გულისხმობს, მაგრამ სპეციალურად რომ აწამებდნენ, იმ გაგებით, რასაც „ნაცები“ იძახიან, ეს არ დასტურდება და შეურაცხყოფაა იმ ექიმების, ვისაც უვლიან და მის ჯანმრთელობაზე ზრუნავენ. მესმის, რომ ეს გათავისუფლების იარაღად არის გამოყენებული, მაგრამ იმ გაგებით წამებას ადგილი არ აქვს, რასაც ამბობენ. სააკაშვილისნაირი ადამიანისთვის ციხეში ჯდომა წამებაა“, – განაცხადა ხვიჩიამ.
მისივე თქმით, ევროპარლამენტარების მიმართ ნდობა საქართველოში ნაკლებად აქვთ, რადგან არ იცნობენ.
„ნდობა შეიძლება, პროცესს ჰქონდეს ან არა. ევროპიდან რაც არ უნდა ილაპარაკონ სააკაშვილზე, ადგილზე უკეთესად ვიცით მისი რეალური მდგომარეობა – კარგად არ არის, მისი საკითხი მართლა გადასაწყვეტია, მისი ციხეში ყოფნა ამ ქვეყნის განვითარებას აფერხებს, მაგრამ ციხეში არ აწამებენ. არასერიოზულია, სააკაშვილს აწამებენ და სასწორს ართმევენ“, – განაცხადა ხვიჩიამ.
