ყოველთვის შეუძლებელი იყო ჩვენი საერთო ევროპული სახლის სრულად წარმოდგენა უკრაინის გარეშე, ახლა კი პოლიტიკურ დონეზე მივაღწიეთ იმას, რომ ევროპული საქმეები უკრაინის გარეშე აღარ განიხილება, – ამის შესახებ უკრაინის პრეზიდენტმა, ვოლოდიმირ ზელენსკიმ ყოველდღიური მიმართვისას ისაუბრა.
უკრაინის პრეზიდენტმა ისაუბრა სანქციების ახალ პაკეტზეც, რომელიც არა მხოლოდ რუსეთის, არამედ სხვა ქვეყნის მოქალაქეებსაც ეხებათ.
„დღეს უკრაინის სანქციების მორიგი პაკეტი გამოქვეყნდა მათ წინააღმდეგ, ვინც რუსეთს ამ ტერორისტული ომის წარმოებაში ეხმარება. კერძოდ, სანქციები თითქმის 300 იურიდიული და 200 ფიზიკური პირის წინააღმდეგ დაწესდა. ესენი არ არიან მხოლოდ რუსეთის მოქალაქეები. მსოფლიოში ყველა, ვინც აგრესორს ეხმარება, პასუხს უკრაინიდან და მთელი მსოფლიოდან მიიღებს“, – აღნიშნა ვოლოდიმირ ზელენსკიმ.
ამასთან, ზელენსკის თქმით, მან შეხვედრა გამართა ესპანეთის პრემიერ-მინისტრ, პედრო სანჩესთან. ლიდერებმა ქვეყნების თანამშრომლობის საკითხზე ისაუბრეს და ხელი მოაწერეს ერთობლივ განცხადებას უკრაინის ევროპული და ევროატლანტიკური პერსპექტივების მხარდაჭერის შესახებ.
„მადლობა ესპანეთს მხარდაჭერისთვის – თავდაცვითი, პოლიტიკური, ეკონომიკური. განსაკუთრებული მადლობა, მინდა, გამოვხატო პატივისცემისთვისა და დახმარებისთვის, რომელიც ჩვენს ხალხს გაუწიეს, რომლებმაც თავშესაფარი იპოვეს ესპანეთში, უკრაინაში საომარი მოქმედებებისგან გაქცეულებმა. მჯერა, რომ მალე ჩვენ შევძლებთ ყველა აუცილებელი პირობის უზრუნველყოფას ჩვენი ხალხისთვის სამშობლოში დასაბრუნებლად“, – განაცხადა ზელენსკიმ.
