26 ოქტომბერს რეფერენდუმია, სადაც ხალხმა უნდა აირჩიოს თავისი ქვეყნის მომავალი. დარწმუნებული ვარ, თბილისი ამ საქმეში იტყვის თავის გადამწყვეტ სიტყვას, - ამის შესახებ "ერთიანობა ნაციონალური მოძრაობის" გენერალურმა მდივანმა პეტრე ცისკარიშვილმა კიკვიძის პარკში მოსახლეობასთან შეხვედრისას განაცხადა.
მისივე თქმით, ეს არის, ერთი მხრივ, არჩევანი სიღარიბესა და იზოლაციას და მეორე მხრივ, ევროპულ და განვითარებად სახელმწიფოს შორის.
"როგორც მთელი საქართველო, რა თქმა უნდა, თბილისიც აკეთებს ისტორიულ არჩევანს 26 ოქტომბერს. ეს არის არჩევანი, ერთი მხრივ, სიღარიბესა და იზოლაციას და მეორე მხრივ, ევროპულ და განვითარებად სახელმწიფოს შორის. გვინდა თუ არა ჩვენ, ქვეყანაში ხალხი, პირიქით, ბრუნდებოდეს, ინვესტიციები შემოდიოდეს, იქმნებოდეს მაღალანაზღაურებადი, მაღალტექნოლოგიური სამუშაო ადგილები თუ პირიქით, როგორც დღეს არის - ქვეყანა იცლებოდეს. აი, ასეთი, მართლაც ისტორიული არჩევანია 26 ოქტომბერს, რომელსაც ხშირად, მათ შორის "ქართული ოცნებაც" რეფერენდუმს უწოდებს. მართლაც ასეა, რადგან ხალხმა უნდა აირჩიოს თავისი ქვეყნის მომავალი და დარწმუნებული ვარ, თბილისი ამ საქმეში იტყვის თავის გადამწყვეტ სიტყვას", - განაცხადა პეტრე ცისკარიშვილმა, რომლის კომენტარსაც პარტიის პრესსამსახური ავრცელებს.
