კელოგი: ზელენსკისთან, ომში მყოფი ერის მებრძოლ და მამაც ლიდერთან, დადებითი დისკუსიები მქონდა
22.02.2025 ნახვები: 420
რუსეთ-უკრაინის ომის საკითხებში აშშ-ის პრეზიდენტის სპეციალურმა წარმომადგენელმა კიტ კელოგმა უკრაინის პრეზიდენტ ვოლოდიმირ ზელენსკისთან და ქვეყნის ეროვნული უსაფრთხოების გუნდთან შეხვედრის დეტალებზე ისაუბრა. მისი თქმით, განხილვები ინტენსიური და პოზიტიური იყო.
"ხანგრძლივი და ინტენსიური დღე უკრაინის უფროს ხელმძღვანელობასთან ერთად. ვრცელი და პოზიტიური დისკუსია ვოლოდიმირ ზელენსკისთან, ომში მყოფი ქვეყნის ნაომარ და მამაც ლიდერთან და მის ეროვნული უსაფრთხოების ნიჭიერ გუნდთან ერთად", – წერს კელოგი სოციალურ ქსელ X-ზე.
გენერლის შეფასება ზელენსკის განცხადებას ეხმიანება, სადაც უკრაინის ლიდერმა აშშ-თან მტკიცე და რეალურად ქმედითი შეთანხმებების აუცილებლობაზე გაამახვილა ყურადღება. შეხვედრაზე მხარეებმა ისაუბრეს ფრონტის ვითარებაზე, უკრაინელი სამხედრო ტყვეების გათავისუფლებასა და უსაფრთხოების სისტემაზე, რომელიც უზრუნველყოფს, რომ ომი აღარასოდეს განმეორდეს.
