გრენლანდიის პრემიერი - რა ესაქმება აშშ-ის ეროვნული უსაფრთხოების მრჩეველს გრენლანდიაში?
24.03.2025 ნახვები: 442
აშშ-ის მაღალი დონის დელეგაცია, რომელსაც ვიცე-პრეზიდენტ ჯეი დი ვენსის მეუღლე, უშა ვენსი უხელმძღვანელებს, მიმდინარე კვირას გრენლანდიას ეწვევა, - ინფორმაციას Reuters-ი ავრცელებს.
გამოცემის ცნობით, დელეგაციის შემადგენლობაში ასევე შედის თეთრი სახლის მრჩეველი ეროვნული უსაფრთხოების საკითხებში, მაიკ უოლცი და ენერგეტიკის მინისტრი, კრის რაითი.
ვიზიტის ფარგლებში დელეგაცია ამერიკული სამხედრო ბაზის მონახულებას და მარხილში შებმული ძაღლების რბოლაზე დასწრებას გეგმავს.
„ვიზიტის მიზანია გრენლანდიის, მისი კულტურის, ისტორიისა და ხალხის გაცნობა და ძაღლების რბოლაზე დასწრება, რომელსაც შეერთებული შტატები სიამაყით აფინანსებს“, - განაცხადა თეთრი სახლის პრესსპიკერმა ეროვნული უსაფრთხოების საკითხებში, ბრაიან ჰიუზმა.
დაგეგმილ ვიზიტს გრენლანდიის პრემიერ-მინისტრი, მუთე ეგედე გამოეხმაურა და განაცხადა, რომ ეს „უაღრესად აგრესიულია".
„რა ესაქმება ეროვნული უსაფრთხოების მრჩეველს გრენლანდიაში? ერთადერთი მიზანი ჩვენზე ძალაუფლების დემონსტრირებაა. მისი ყოფნა გრენლანდიაში უდავოდ გააძლიერებს ამერიკის რწმენას ტრამპის მისიის მიმართ და ზეწოლა გაიზრდება“, - აღნიშნა პრემიერმა.
შეგახსენებთ, დონალდ ტრამპი აშშ-ის მხრიდან გრენლანდიის ანექსიას არ გამორიცხავს და აცხადებს, რომ შეერთებულ შტატებს ის ეროვნული უსაფრთხოებისთვის სჭირდება.
