გერმანიის კანცლერი ფრიდრიხ მერცი ევროკავშირის წევრ ქვეყნებს უკრაინის ფინანსურ დახმარებაში სამართლიანი წვლილის შეტანისკენ მოუწოდებს. გერმანული მედიის ცნობით, მერცმა ევროპული საბჭოს პრეზიდენტ ანტონიო კოშტას წერილი გაუგზავნა, რომელშიც მიანიშნებს, რომ შეთანხმების მიუღწევლობის შემთხვევაში გერმანიამ შესაძლოა ევროკავშირის სხვა ფინანსური გადაწყვეტილებები დაბლოკოს.
წერილში საუბარია 45 მილიარდ ევროზე, რომელიც ევროკავშირმა უკრაინის 2027 წლის დაფინანსების დეფიციტის შესავსებად უნდა უზრუნველყოს.
„უკრაინისთვის დახმარების გაწევის მზადყოფნის ზოგადი დადასტურება ამ პრობლემის გადაჭრისა და სხვა საკითხების განხილვის წინაპირობაა, განსაკუთრებით ფინანსური შედეგების მქონე საკითხებისა“, – აღნიშნავს მერცი.
გერმანიის კანცლერის განცხადებით, უკრაინის მხარდაჭერის ფინანსური ტვირთი ევროკავშირის წევრ ქვეყნებს შორის სამართლიანად უნდა განაწილდეს.
„უკრაინის მხარდაჭერა ჩვენი საერთო ევროპული უსაფრთხოების განუყოფელი ნაწილია და ეს პრინციპი ამ მხარდაჭერის ტვირთის განაწილებაზეც უნდა ვრცელდებოდეს“, – აცხადებს მერცი.
ამასთან, კანცლერი მოითხოვს, რომ ევროკავშირის 2028–2034 წლების ბიუჯეტზე მოლაპარაკებების ფარგლებში უკრაინის მდგრადი, მრავალწლიანი დაფინანსების მექანიზმი განისაზღვროს.
მერცი ანტონიო კოშტას მოუწოდებს, უკრაინის დაფინანსების საკითხი 13 ნოემბერს დუბლინში დაგეგმილი ევროკავშირის არაფორმალური სამიტის ერთ-ერთ პრიორიტეტად აქციოს.
ევროკომისიის შეფასებით, უკრაინის 2027 წლის ფინანსური დახმარების დეფიციტი 70 მილიარდ ევროს შეადგენს, საიდანაც 45 მილიარდი ევროკავშირმა უნდა უზრუნველყოს.
