საქართველოს პროკურატურამ თბილისში მდებარე ერთ-ერთ სკოლაში არასრულწლოვნის მიმართ სექსუალური ხასიათის ძალმომრეობითი მოქმედების ბრალდებით სპორტული წრის ყოფილ მასწავლებელს ბრალი წარუდგინა. პროკურატურის ინფორმაციით, დანაშაული 2000-2001 წლებშია ჩადენილი, როდესაც დაზარალებული 8-9 წლის იყო.
უწყების ცნობით, ბრალდებულმა, რომელიც იმ პერიოდში სკოლაში სპორტულ წრეს ხელმძღვანელობდა, არასრულწლოვან მოსწავლესთან არაერთხელ დაამყარა სექსუალური ხასიათის კონტაქტი.
„ბრალდებულს ბრალდება საქართველოს სისხლის სამართლის კოდექსის 138-ე მუხლის მე-3 ნაწილის „ე“ ქვეპუნქტითა და მე-4 ნაწილით – სექსუალური ხასიათის ძალმომრეობითი მოქმედება სამსახურებრივი მდგომარეობის გამოყენებით იმ პირის მიმართ, რომელსაც თოთხმეტი წელი არ შესრულებია – წარედგინა, რაც სასჯელის სახით ოც წლამდე თავისუფლების აღკვეთას ითვალისწინებს“, – ნათქვამია პროკურატურის ინფორმაციაში.
პროკურატურა ბრალდებულისთვის აღკვეთის ღონისძიების სახით პატიმრობის შეფარდების შუამდგომლობით სასამართლოს კანონით დადგენილ ვადაში მიმართავს.
