გვინდა, იყოს სწორი კონკურენციის პირობები ხორბლის იმპორტს და გადამუშავებას და ფქვილის იმპორტს შორის. შესაბამისად, ბაზარზე სტაბილურობა იქნება – ამის შესახებ ხორბლისა და ფქვილის მწარმოებელთა ასოციაციის თავმჯდომარის ლევან სილაგავამ განაცხადა.
მისივე თქმით, დისბალანსი გამოწვეულია იმით, რომ ხორბალსა და ფქვილს შორის საიმპორტო ფასები განსხვავებულია და წისქვილკომბინატებს არ უღირთ ფქვილის შემოტანა.
ამასთან, ლევან სილაგავა ამბობს, რომ სერიოზულია პრობლემა, რომელიც წისქვილკომბინატების დახურვას ეხება და საკითხის გადაჭრის მიზნით, პრემიერ-მინისტრთან შეხვედრას ითხოვენ.
„ჩვენი განცხადება იყო, რომ მთლიანობაში ქვეყანაში გვინდა, იყოს სწორი კონკურენციის პირობები ხორბლის იმპორტს და გადამუშავებას და ფქვილის იმპორტს შორის. ამ შემთხვევაში იმუშავებს წისქვილკომბინატი. იქნება ფქვილი პურის ქარხნებისათვის კონკურენტულ ფასად. შესაბამისად, ბაზარზე სტაბილურობა იქნება.
დაახლოებით სამი დღის წინ იყო ჩემი ინტერვიუ, როდესაც აღვწერეთ ბაზარზე სიტუაცია, წისქვილკომბინატების პრობლემები, მარაგების თემა და ის, რომ დღეს შემოდის ფქვილი და არ შემოდის ხორბალი. აქედან გამომდინარე, წისქვილკომბინატები ჩერდებიან. ასეთივე განცხადება გავაკეთეთ დაახლოებით 15-20 დღის წინ და მაშინ ვთქვით, რომ მარაგი იყო უფრო მეტი, დაახლოებით 20-25 დღის.
ამის საქმის კურსში იყო მთავრობაც. შინაარსობრივად სტატია იყო სწორად, მაგრამ, სამწუხაროდ, სათაურში იყო გამოტანილი, რომ წისქვილკომბინატებში დარჩენილია 10 დღის მარაგი და წისქვილკომბინატები იხურება. აჟიოტაჟის შემდეგ განცხადება გავაკეთეთ და ვთქვით, რომ ქვეყანაში ფქვილად არის მარაგები, ამას სამინისტრო უკეთებს მონიტორინგს. თუმცა, პრობლემა, რომელიც წისქვილკომბინატების დახურვის შესახებ არსებობს, ეს ძალიან სერიოზულია და ამასთან დაკავშირებით გვინდა შეხვედრა პრემიერთან. ამ პრობლემის შესახებ თვეების განმავლობაში ვმუშაობ სამმხრივ სამუშაო ჯგუფთან, რომელშიც წარმოდგენილია ეკონომიკის, ფინანსთა, სოფლის მეურნეობის სამინისტრო. სამუშაო ჯგუფში ერთადერთ წინადადებას ვაყენებდით – დისბალანსი, რომელიც გამოწვეულია იმით, რომ დაბეგვრები, ანუ საიმპორტო ფასები განსხვავებულია ხორბალსა და ფქვილს შორის, არის მიზეზი, რომ წისქვილკომბინატებს არ უღირთ ფქვილის შემოტანა და ისინი გაჩერდნენ. პრემიერთან შეხვედრას ვითხოვთ, რადგან სამუშაო ჯგუფმა თავისი თავი ამოწურა. იქ არ იყო ერთგვაროვანი პოზიციები. ყველა თანხმდებოდა, რომ ეს პრობლემა დგას და გადასაწყვეტია, მაგრამ გადაწყვეტის გზებთან დაკავშირებით იყო აბსოლიტური სხვადასხვაობა. აქედან გამომდინარე გვინდა პრემიერთან შეხვედრა“, – განაცხადა ლევან სილაგავამ
