ვერ ვხედავთ უთანხმოებას ევროკავშირში, როდესაც საუბარია იარაღსა და სანქციებზე, უთანხმოებაა, როდესაც საუბარია უკრაინის კანდიდატის სტატუსზე- კულება

ევროკავშირში უთანხმოებაა უკრაინის წევრობაზე, იარაღსა და სანქციებთან დაკავშირებით კი – არა, – უკრაინული მედიის ცნობი, ამის შესახებ ქვეყნის საგარეო საქმეთა მინისტრმა, დმიტრო კულებამ ნიდერლანდების მედიასთან საუბრისას განაცხადა.

„ჩვენ ვერ ვხედავთ უთანხმოებას ევროკავშირში სიტყვასა და საქმეში, როდესაც საუბარია იარაღსა და სანქციებზე, თუმცა ვხედავთ, როდესაც საუბარია კანდიდატის სტატუსზე ევროკავშირის წევრობასთან დაკავშირებით. უკვე სამი თვეა, ვისმენთ, რომ უკრაინა ევროპას ეკუთვნის და იმას, თუ როგორ მამაცურად ვიცავთ ევროპულ ღირებულებებს, თუმცა პოლიტიკური აღიარება არ არის. ამიტომ, საკუთარ თავს კითხვას ვუსვამთ, რამდენად გულწრფელია ეს ლამაზი სიტყვები“, – აღნიშნა კულებამ.

მისი თქმით, ევროკავშირში არიან სკეპტიკურად განწყობილები უკრაინის წევრობასთან დაკავშირებით, თუმცა ვერც ერთი ევროპული ქვეყანა ვერ კისრულობს წამყვან როლს ამ გადაწყვეტილების დაბლოკვაში.

„ისინი, ვინც ამბობენ, რომ უკრაინა არ არის მზად ევროკავშირისთვის და არ დგამენ ამ ნაბიჯს, საზოგადოებრივი აზრით მანიპულირებენ. ჩვენ არ ვამბობთ, რომ ხვალ გვინდა ევროკავშირში შესვლა. კანდიდატის სტატუსის მინიჭებით, თქვენ დაგვეხმარებით გადავლახოთ არსებული პრობლემები, მათ შორის კორუფცია, და განვავითაროთ ჩვენი ქვეყანა ისე, რომ გავძლიერდეთ“, – აცხადებს კულება.