რუსეთის ფედერაციის საბჭოს საერთაშორისო ურთიერთობების კომიტეტის ხელმძღვანელი გრიგორი კარასინი აცხადებს, რომ ევროკავშირი, აშშ და შვეიცარია ჟენევის დისკუსიების ჩაშლისკენ ისწრაფვიან. რუსული მედიის ცნობით, აღნიშნულის შესახებ, რუსეთის ფედერაციის საბჭოს საერთაშორისო ურთიერთობების კომიტეტის ხელმძღვანელმა სოციალურ ქსელში დაწერა.
„ძირითადი შემაკავებელი მექანიზმი, რომელიც უზრუნველყოფს რეგიონში პროგნოზირებადობას და სტაბილურობას, იყო 2008 წელს მოწვეული ჟენევის საერთაშორისო დისკუსიები, რომლებშიც მონაწილეობას იღებენ სოხუმის, ცხინვალის, თბილისის, ასევე რუსეთისა და შეერთებული შტატების წარმომადგენლები გაერო-ს, ევროკავშირის და ეუთო-ს შუამავლობით“, – წერს კარასინი.
კარასინის თქმით, „ჯამში დატვირთული დიალოგისა და ცხარე დისკუსიების 55 რაუნდი გაიმართა“. მან ჟენევის დისკუსიებს სამხრეთ კავკასიის რეგიონში უსაფრთხოების სადაზღვევო ბადე უწოდა.
„ბოლო თვეებში შემაშფოთებელია ევროკავშირის, შეერთებული შტატების და თავად შვეიცარიის აშკარა სწრაფვა, ჩაშალონ ჟენევის დისკუსიების მუშაობა უკრაინაში განვითარებული მოვლენების საბაბით. ბოლო შეხვედრები გაიმართა 2021 წლის დეკემბერში. ეს არის უკიდურესად საშიში, რადგან ამან შესაძლოა, გამოიწვიოს მიზანმიმართული პროვოკაცია. ამგვარად, სააკაშვილის აგრესიის მორიგი თარიღის აღნიშვნისას, ჩვენ უნდა ვიფიქროთ იმაზე, თუ როგორ ავიცილოთ თავიდან მსგავსი რამ მომავალში“, – აღნიშნავს კარასინი.
