აზერბაიჯანის საგარეო საქმეთა მინისტრ ჯეიჰუნ ბაირამოვის განცხადებით, ყარაბაღში ბოლოდროინდელი დაძაბულობის მთავარი მიზეზი სომხეთის მიერ თავისი ვალდებულებების შეუსრულებლობაა.
აზერბაიჯანული მედიის ცნობით, აღნიშნულის შესახებ აზერბაიჯანის საგარეო საქმეთა მინისტრმა ანკარაში, ელჩების რიგით მე-13 კონფერენციაზე განაცხადა.
მინისტრმა აღნიშნა, რომ 44-დღიანი ომის დასრულებისა და სამმხრივი შეთანხმების ხელმოწერის შემდეგ, სომხეთს ნაკისრი ვალდებულებები დაახლოებით წელიწადის და ცხრა თვის განმავლობაში არ შეუსრულებია.
„ვალდებულებებზე საუბრისას ვგულისხმობ იმას, რომ სომხეთის შეიარაღებულ ძალებს ჯერ არ დაუტოვებიათ ყარაბაღი. ასეთი ვალდებულება სომხეთმა სამმხრივი შეთანხმებით აიღო. როდესაც რეგიონში სამშვიდობო ძალები შევიდნენ, სომხეთის შეიარაღებული ძალები უნდა გასულიყვნენ, მაგრამ სომხეთის შეიარაღებული ძალები ისევ იქ იმყოფებიან. 3 აგვისტოს კიდევ ერთხელ სცადეს პროვოკაციის მოწყობა და ჩვენი ერთ-ერთი ახალგაზრდა სამხედრო მოსამსახურე იქცა შეჰიდად. ამის საპასუხოდ აზერბაიჯანის შეიარაღებულმა ძალებმა ოპერაცია „შურისძიება“ დაიწყეს და ამ ოპერაციის დროს მტერს გამანადგურებელი დარტყმა მიაყენეს. შუამავლების მიმართვის შემდეგ ეს ოპერაცია 3 აგვისტოს, საღამოს შეწყდა“, – განაცხადა ბაირამოვმა.
