არასამთავრობო ორგანიზაციებმა და სამოქალაქო აქტივისტებმა უკრაინას დამოუკიდებლობის დღე აქცია-პერფორმანსით მიულოცეს.
ისინი რიყის პარკში შეიკრიბნენ, მშვიდობის ხიდიდან უკრაინის დროშა გადმოფინეს, საქართველოსა და უკრაინის ჰიმნები გააჟღერეს და უკრაინას გამარჯვება, მშვიდობა და ერთიანობა უსურვეს.
ანტიკორუფციული მოძრაობის წევრის ირაკლი ფავლენიშვილის თქმით, საქართველოსა და უკრაინის დამოუკიდებლობა ერთმანეთზეა გადაჯაჭვული, რადგან ორივე ქვეყნის სუვერენიტეტს საფრთხეს რუსეთი უქმნის.
„საქართველოს და უკრაინის დამოუკიდებლობა არის გადაჯაჭვული ერთმანეთზე, იმიტომ რომ ამ ორი ერის დამოუკიდებლობას ჰყავს ერთი მტერი, რუსეთის სახით და ამიტომაც იყო, რომ უკრაინელები იბრძოდნენ საქართველოს დამოუკიდებლობისთვის აფხაზეთის ომში, 2008 წლის აგვისტოში ყველაზე მეტად უკრაინელები დაგვიდგნენ გვერდზე და დღესაც ყველაზე მეტი მებრძოლი, ჯარისკაცი უკრაინელების გარდა გვყავს ქართველებს უკრაინაში რუსეთის ანექსიის წინააღმდეგ. იმიტომ, რომ ჩვენ კარგად გვესმის, რომ ყირიმის დაბრუნება ნიშნავს, ფაქტობრივად აფხაზეთის დაბრუნებას და ზოგადად უკრაინაში, რუსეთის იმპერიის დამარცხება ნიშნავს ყველგან. პოსტსაბჭოთა სივრცეში რუსული იმპერიალიზმის აღზევების დამარცხებას. “ - განაცხადა ირაკლი ფავლენიშვივილმა.
უკრაინამ 1991 წლის 24 აგვისტოს საბჭოთა კავშირისგან დამოუკიდებლობა გამოაცხადა. ასევე დღეს უკრაინაში რუსეთის შეჭრიდან 6 თვე გავიდა.
