ნინოწმინდის ობოლ და მზრუნველობამოკლებულ ბავშვთა პანსიონთან დაკავშირებით ბოდბელ მთავარეპისკოპოს იაკობსა და სახალხო დამცველ ნინო ლომჯარიას შორის შეხვედრა მიმდინარეობს.
როგორც შეხვედრის დაწყების წინ საპატრიარქოს საზოგადოებასთან ურთიერთობის სამსახურის ხელძღვანელმა, დეკანოზმა ანდრია ჯაღმაიძემ განაცხადა, ის იმედს გამოთქვამს, რომ არსებული ვითარება განეიტრალდება.
„დღეს არის შეხვედრა, არის ძალიან პოზიტიური პროცესები ამ დაძაბულ ვითარებაში. მეუფე იაკობმა გარკვეული ნაბიჯების გადადგმა მოასწრო უკვე ამ მცირე ხანში, იყო დაანონსებული შესაძლო შეხვედრის შესახებ და სახალხო დამცველი გამოეხმაურა ამ შეთავაზებას. დღეს საუბარი გვექნება გარკვეულ საკითხებზე. იმედი გვაქვს, რომ განეიტრალდება ვითარება. მე მგონია, რომ დაგვავიწყდა ბავშვები, გვახსოვს მარტო როგორ შევაღწიოთ შიგნით. ბავშვებზე ვიფიქროთ, ეს ყველაფერი დაიწყო იმით, რომ თითქოს ეკლესიისგან უნდა დავიცვათ ბავშვები და გამოვა ისე, რომ ტელევიზიისგან იქნებიან ბავშვები დასაცავი ცოტა ხანში. შტურმი დავამთავროთ, ბავშვებს ვაცადოთ, რომ მშვიდ გარემოში იცხოვრონ", - განაცხადა დეკანოზმა ანდრია ჯაღმაიძემ.
