ქალმა დეპუტატებმა, ანა ნაცვლიშვილმა, ანა ბუჩუკურმა, ანი წითლიძემ, თეონა აქუბარდიამ, ხათუნა სამნიძემ და თამარ კორძაიმ ფემიციდის საკითხზე პარლამენტში ერთობლივი პრესკონფერენცია გამართეს.
როგორც პარტია „ლელოს“ წევრმა, ანა ნაცვლიშვილმა პრესკონფერენციაზე განაცხადა, ქალთა წინააღმდეგ ძალადობაზე რეაგირება ყველას საერთო საქმეა და არა მხოლოდ რომელიმე უწყების.
ანა ნაცვლიშვილის თქმით, ქალი დეპუტატები განსაკუთრებიტ გადაწყვეტილებების მიმღებ მამაკაც პოლიტიკოსებს მოუწოდებენ, პრობლემის მოსაგვარებლად ქმედითი ნაბიჯები გადადგან.
„დღეს ქალი დეპუტატები ვეხმაურებით იმ შემაშფოთებელ და საზარელ ტენდენციას, რომელიც კვლავ დაბრუნდა ჩვენს საზოგადოებაში. ეს არის ქალთა მკვლელობები ქალობის ნიშნით. საზოგადოება შეშფოთებულია არაერთი შემთხვევით, როდესაც ხდება ქალების მკვლელობა და ამაზე ჩვენ ვეღარ ვხედავთ სახელმწიფოს მხრიდან იმ ხარისხის რეაგირებასაც კი, რომელიც წინა წლებში გვქონდა. შეიმჩნიეთ ფემიციდი, შეიმჩნიეთ ძალადობა ქალების წინააღმდეგ. ეს უნდა იყოს სახელმწიფოს ერთ-ერთი მთავარი პოლიტიკური პრიორიტეტი. ვიდრე პოლიტიკოსი მამაკაცები, გადაწყვეტილების მიმღები მამაკაცები და ხშირად ქალებიც დუმილით ხვდებით ამ საშინელ ტენდენციას, ეს ტენდენცია გაგრძელდება და ამას ვერ მოერევა მხოლოდ ცალკეული ეფექტური რეაგირებები პოლიციელების მხრიდან თუ პარლამენტის გენდერულ საბჭოში მიმდინარე ძალიან მნიშვნელოვანი, სწორი საკანონმდებლო პროცესი. ეს არ არის არც მხოლოდ პარლამენტის ერთი საბჭოს, არც მხოლოდ შინაგან საქმეთა სამინისტროს და არც რომელიმე უწყების საქმე. ეს ყველას საერთო საქმეა.
ვიდრე ფემიციდს არ შეიმჩნევთ და ამაზე ყველა ხმამაღლა არ გააკეთებთ განცხადებას, რომ ეს არის დასაგმობი, მიუღებელი და ყველა, სახელმწიფო უწყება, საზოგადოება, ხელისუფლება და ოპოზიცია არ გავერთიანდებით ამ პრობლემის დასასრულებლად, ის გაგრძელდება და შეიწირავს ქალების სიცოცხლეს, დაანგრევს ბავშვების ცხოვრებას. დაანგრევს და დაამახინჯებს საზოგადოების ცხოვრებას. განსაკუთრებით პოლიტიკოს მამაკაცებსა და გადაწყვეტილების მიმღებ პირებს მოგიწოდებთ, შეიმჩნიეთ ძალადობა, დაგმეთ ფემიციდი და დღესვე გადავდგათ ეფექტიანი, შედეგზე ორიენტირებული ნაბიჯები, რომელიც ამ დროის განმავლობაში გაყინული და გაჩერებულია. ჩვენ, ქალი პოლიტიკოსები, ყველაფერს გავაკეთებთ, რათა საზოგადოების ერთიანობით ეს პრობლემა ერთხელ და სამუდამოდ წარსულს ჩაბარდეს“, – განაცხადა ანა ნაცვლიშვილმა.
