ევროკავშირი შეშფოთებულია გაზსადენების „ჩრდილოეთ ნაკადი 1-ის“ და „ჩრდილოეთ ნაკადი 2-ის“ დაზიანების გამო და მიიჩნევს, რომ აღნიშნული ინციდენტები შემთხვევითობა არ არის, – ამის შესახებ ნათქვამია ევროკავშირის სახელით გავრცელებულ ჯოზეფ ბორელის განცხადებაში.
განცხადებაში ასევე აღნიშნულია, რომ მილსადენების დაზიანების შედეგად მოხდა გაჟონვა ბალტიის ზღვის საერთაშორისო წყლებში.
„უსაფრთხოება და გარემოსდაცვითი საკითხები უმთავრესი პრიორიტეტია. ეს ინციდენტები არ არის შემთხვევითობა და ყველა ჩვენგანს აზარალებს. ყველა ხელმისაწვდომი ინფორმაცია აჩვენებ, რომ ეს გაჟონვა არის განზრახ ქმედების შედეგი“, – აღნიშნულია საგარეო პოლიტიკისა და უსაფრთხოების საკითხებში ევროკავშირის უმაღლესი წარმომადგენლის განცხადებაში.
ბორელის განცხადებით, ევროკავშირი მხარს დაუჭერს ნებისმიერ გამოძიებას, რომელიც სრულად მოჰფენს ნათელს იმას, თუ რა მოხდა და რატომ. ამასთან, ევროკავშირი გადადგამს დამატებით ნაბიჯებს ენერგოუსაფრთხოების სფეროში მდგრადობის გასაძლიერებლად.
„ევროპული ენერგეტიკული ინფრასტრუქტურის ნებისმიერი სახის განზრახ დარღვევა აბსოლუტურად მიუღებელია და ამას მოჰყვება მტკიცე და ერთიანი პასუხი“, – აღნიშნულია განცხადებაში.
