ჩვენი საერთო მიზანი იყო არაფორმალური პლატფორმის შექმნა, სადაც ვითანამშრომლებთ, იდეებს გავუზიარებთ ერთმანეთს, მოვნახავთ გამოსავალს მშვიდობისა და განვითარებისთვის ევროპაში და ჩვენ წარმატებას მივაღწიეთ, – ეს განცხადება ჩეხეთის პრემიერ-მინისტრმა, პეტრ ფიალამ პრაღაში, ევროპული პოლიტიკური გაერთიანების პირველი შეხვედრის შემდეგ გამართულ პრესკონფერენციაზე გააკეთა. მისივე თქმით, ახალი გაერთიანება არც ერთ არსებულ ფორმატს არ ჩაანაცვლებს.
„ჩვენ არ მიგვიღია არავითარი ფორმალური რეზოლუცია. უბრალოდ ვგრძნობდით ასეთი სივრცის საჭიროებას, სადაც შეხედულებებს გავუზიარებთ ევროპას და მის ფარგლებს გარეთაც. ეს შეხვედრა ევროპის კონტინენტისთვის კრიტიკულ დროს გაიმართა. რუსეთის აგრესია უკრაინის წინააღმდეგ გამოწვევას წარმოადგენს ჩვენი საერთო უსაფრთხოებისა და სტაბილურობისთვის და ყველას სხვადასხვაგვარად გვეხება“,-განაცხადა ფიალამ.
ევროკავშირის საბჭოს თავმჯდომარე ქვეყნის პრემიერ-მინისტრმა განაცხადა, რომ დღეს პრაღაში შეკრებილმა 44 ქვეყნის ლიდერებმა სხვადასხვა საკითხებზე ისაუბრა. მათ შორის მან დაასახელა მშვიდობა, სტაბილურობა, მიგრაცია და ეკონომიკა.
„ჩვენი ერთობლივი მიზანი არის ერთად მუშაობა, რათა განვამტკიცოთ ევროპის უსაფრთხოება და კეთილდღეობა“, – განაცხადა ფიალამ.
მისივე თქმით, ევროპული პოლიტიკური გაერთიანების შემდეგი შეხვედრა მოლდოვის დედაქალაქში, კიშინიოვში გაიმართება. შემდეგ კი ესპანეთსა და დიდ ბრიტანეთში.
