თბილისის ვიცე-მერის ირაკლი ხმალაძის შეფასებით, მიუღებელი და სირცხვილია, როდესაც პოლიტიკოსები ვაკის პარკში მომხდარი ტრაგედიის სათავისოდ გამოყენებას ცდილობენ.
როგორც მან ჟურნალისტებს განუცხადა, ოპოზიცია თბილისის მუნიციპალიტეტის მთავრობის დღევანდელ სხდომას ვერ დაესწრებოდა, რადგან სხდომა ფაქტობრივად, არ ჩატარებულა.
„მთავრობის სხდომა ფაქტობრივად არ ჩატარებულა, არცერთი საკითხი არ განხილულა, ეს იყო მერის გადაწყვეტილება. შესაბამისად, ოპოზიციაც ვერაფერს დაესწრებოდა. რა პასუხი უნდა გავცე ოპოზიციას, როდესაც ისინი მერის გადადგომას ითხოვენ. ჩემთვის მიუღებელია და უკვე სირცხვილია, როდესაც პოლიტიკოსები ასეთი ტრაგედიის სათავისოდ გამოყენებას ცდილობენ. ამ პრაქტიკას სამწუხაროდ, უკანასკნელი წლები ძალიან ხშირად ვხვდებით. ეს არის ჩემთვის ამაზრზენი და ამის თაობაზე მეტი კომენტარის გაკეთება არ მინდა“,-განაცხადა ხმალაძემ.
მისი განმარტებით, თბილისის მუნიციპალიტეტის მთავრობის სხდომის დღის წესრიგი არ შეცვლილა, თუმცა, მერის გადაწყვეტილებით, დღევანდელ სხდომაზე არცერთი საკითხი არ განხილულა.
ცნობისთვის, თბილისის მერიის შენობასთან დაძაბულობა იყო. საკრებულოს ოპოზიციონერი დეპუტატები მერიის შენობაში შესვლას ცდილობდნენ, რის უფლება დაცვის სამსახურმა არ მისცა.
"ნაციონალური მოძრაობის" და "ლელოს" დეპუტატები ახსნა-განმარტებას მოითხოვდნენ, თუ რის საფუძველზე არ აძლევდნენ მათ მერიის შენობაში შესვლის უფლებას. მათივე თქმით, მერიის უსაფრთხოების სამსახურის წარმომადგენლებმა უკანონო დავალება შეასრულეს.
ირაკლი ხმალაძე:რა პასუხი უნდა გავცე ოპოზიციას, როდესაც ისინი მერის გადადგომას ითხოვენ - სირცხვილია
ნახვები: 869
