„როდესაც სტრატეგიული ობიექტების მფლობელობა და მართვა იქნება სახელმწიფოს ხელში, ინვესტიციები უფრო გაბედულად შემოვა საქართველოში. ნამახვანჰესის მშენებლობას რა პერიპეტიებიც მოჰყვა, რომ ყოფილიყო საქართველოს ხელისუფლების 51% მფლობელობამ, ის ყველაფერი არ მოხდებოდა, განაცხადა უფრაქციო პარლამენტის წევრმა ფრიდონ ინჯიამ პარლამენტის პლენარულ სხდომაზე პოლიტიკური განცხადებების ფორმატში გამოსვლისას.
მისი თქმით, საბანკო სექტორში მოგება 2 მლრდ ლარამდეა.
„წარმოიდგინეთ, საბანკო სექტორში 51% რომ ყოფილიყო სახელმწიფოსი, 1 მლრდ ხომ დარჩებოდა სახელმწიფოს? მაგრამ არის სხვა გზაც - ერთი მაინც შეიქმნას სახელმწიფო ბანკი. გადავხედოთ, როგორ უდგება ამ მხრივ სტრატეგიულ ობიექტებს ჩინეთის სახალხო რესპუბლიკა. ჩინეთში ძირითადი სტრატეგიული ობიექტები სახელმწიფოს ხელშია ან მისი კონტროლის ქვეშაა. შედეგიც სახეზეა, რა ტემპით მიდის ჩინეთის სახალხო რესპუბლიკა",- განაცხადა ფრიდონ ინჯიამ.
