ამ ეტაპზე ჩვენი უდიდესი შეშფოთება ეხება ევროკავშირის შუამავლობით მიღწეულ შეთანხმებას, რომელსაც ხელი მოვაწერეთ. ჩვენი აზრით, მისი განხორციელება საფრთხეშია და ეს არის ჩვენი შეშფოთების მთავარი მიზეზი, - ამის შესახებ საქართველოს პარლამენტის ოპოზიციონერმა დეპუტატმა, სალომე სამადაშვილმა ვირტუალურ კონფერენციაზე განაცხადა, რომელიც ევროპარლამენტის დემოკრატიის მხარდაჭერის, არჩევნების საკოორდინაციო ჯგუფისა და საქართველოს პარლამენტის მიერ ერთობლივად არის ორგანიზებული.
„საქართველოში ახლა შექმნილი პოლიტიკური რეალობის გათვალისწინებით, როდესაც დღეს ოთხმა მსხვილმა ტელეკომპანიამ მთავრობის წინააღმდეგ პროტესტის ნიშნად მაუწყებლობა შეწყვიტა, ჩვენ ვართ სიტუაციის წინაშე, როდესაც შეიძლება, სწრაფად ვიხლოთ პოლიტიკური გარემოს კრიზისის გამწვავება. როგორც ოპოზიცია, ჩვენ ანგარიშვალდებულნი ვართ ამომრჩევლებისა და საქართველოს მოქალაქეების წინაშე. ვფიქრობ, სამართლიანი იქნება იმის თქმა, რომ დღეს ჩვენი მოქალაქეები უკიდურესად შეშფოთებულები არიან თავიანთი ქვეყნის მომავლის, თავიანთი უსაფრთხოების გამო, იმ ფაქტის გამო, რომ პირველად, საქართველოს ისტორიაში დაწვეს ევროპული დროშა. წინა გამომსვლელებმა აღნიშნეს, რომ ოპოზიციამ ასევე უნდა აიღოს პასუხისმგებლობა პარლამენტში პროცესებზე და ჩვენ მაქსიმუმს ვაკეთებთ ამისთვის. თუმცა, ჩვენთვის უკიდურესად შემაშფოთებელია, რომ ვერ ვხედავთ, მთავრობა ასრულებდეს თავის გასაკეთებელს 19 აპრილის შეთანხმების შესრულების მხრივ. ალბათ, იცით, გუშინწინ პარლამენტმა დაამტკიცა უზენაესი სასამართლოს მოსამართლეები, რაც ეწინააღმდეგება ჩვენს მიერ ხელმოწერილ შეთანხმებას. თუ ჩვენ არ გვექნება ევროპარლამენტში, ევროკომისიაში ჩვენი კოლეგების მხრიდან სრული ჩართულობა და ზეწოლა, შესაძლოა, აღმოჩნდეს, რომ ჩვენ გვაქვს შეთანხმება, რომელიც ხელმოწერილია მხოლოდ ფურცელზე და არ სრულდება პოლიტიკური გადაწყვეტილებებით", - განაცხადა სამადაშვილმა.
სალომე სამადაშვილის განცხადებით, საქართველოში პოლიტიკური სიტუაცია ძალიან სწრაფად უარესდება.
„როგორც იხილეთ, პარლამენტის სპიკერმა ისაუბრა ბოლო რამდენიმე დღის განმავლობაში საქართველოში მომხდარ ძალადობაზე, თუმცა ის, რაც სავარაუდოდ მან არ ახსენა და მე ვარ ვალდებული ვახსენო არის მმართველი პარტიის ლიდერების როლი იმ გარემოებების შექმნაში, სადაც ძალადობა შეიძლება მოხდეს. მმართველი პარტიის თავმჯდომარემ, ბატონმა კობახიძემ გააკეთა განცხადებები LGBTI-უფლებების დაცვაში ჩართული არასამთავრობო ორგანიზაციების შესახებ, რომ მათ მართავს ოპოზიცია, რომ ისინი ანტიქრისტიანულია, ანტიქართული. ჩვენი შეშფოთების მიზეზი არის ის, რომ ჩვენ ვხედავთ ძალიან მკაფიო სიგნალებს, საქართველოში პოლიტიკური სიტუაცია ძალიან სწრაფად უარესდება", - განაცხადა სამადაშვილმა.
