მოძრაობა „ხალხის ძალის“ წევრის, გურამ მაჭარაშვილის განცხადებით, ევროსაბჭოს საპარლამენტო ასამბლეის რეზოლუციაში აღინიშნა, რომ საქართველოს პრაქტიკულად ყველა რეკომენდაცია აქვს შესრულებული. მაჭარაშვილის თქმით, ეს პოზიტიური შეტყობინებაა.
ამასთან, როგორც მაჭარაშვილი ამბობს, ევროსაბჭოდან მიღებული რეკომენდაციები გათვალისწინებული იქნება.
„ევროსაბჭოდან მიღებული რეკომენდაციები საქართველოში სრულდებოდა და ახლაც იქნება გათვალისწინებული, მაგრამ არ არსებობს ქვეყანა, რომ ევროკავშირს არ ჰქონდეს რაიმე ტიპის რეკომენდაცია, მით უფრო, მას რეკომენდაციები ექნება არაწევრ ქვეყანასთან. არაერთ რეზოლუციაშია ჩაწერილი, რომ საქართველო ნამდვილად თავსებადია ევროპასთან. უბრალოდ, ახლა ეს დამოკიდებულია პოლიტიკაზე. აღინიშნა, რომ პრაქტიკულად ყველა რეკომენდაცია შესრულებულია, თუმცა გარკვეული ტიპის რეკომენდაციების შესრულება გაგრძელდება. კანდიდატის სტატუსის მიღება არ ნიშნავს რეფორმების დასრულებას. ეს ისეთი სფეროებია, რომ მუდმივად განახლებადია, მათ შორის ევროკავშირის ქვეყნებში. ეს შეტყობინება პოზიტიურია. თუ ვინმეს წინსვლა და კანდიდატის სტატუსი არ უხარია, ვიცით, ვინც არიან – ისინი განაგრძობენ თავიანთ სამყაროში ცხოვრებას. ჩვენთვის და საქართველოსთვის კი ეს პოზიტიური სიგნალია“, – განაცხადა გურამ მაჭარაშვილმა.
