სპალეტი: "სასუოლო" "კვარას" წყალობით დავამარცხეთ

სერია A-ს 23-ე ტურში "ნაპოლი" "სასუოლოს" ესტუმრა და 2:0 დაამარცხა. მატჩის შემდეგ "პარტენოპეის" მთავარმა მწვრთნელმა ლუჩანო სპალეტიმ სხვადასხვა თემებზე, მათ შორის ხვიჩა კვარაცხელიაზეც ისაუბრა.

63 წლის იტალიელის თქმით, მისი გუნდის გამარჯვება სწორედ ქართველი გარემარბის დამსახურებაა.

"ამ გამარჯვებაში უდიდესი წვლილი ხვიჩა კვარაცხელიას მიუძღვის, რომელმაც ცენტრიდან დრიბლინგი პეპლის სიმსუბუქით დაიწყო, რა თქმა უნდა, აღსანიშნავია ოსიმენის გოლიც, მიუხედავად ორი გაცუდებული მომენტისა. აუცილებელია, რომ მეტი ბალანასი ვიპოვოთ, რადგან მუდამ მუდამ ამ 2 ფეხბურთელზე დამოკიდებულები არ ვიყოთ. რაც შეეხება ნიგერიელის ტრავმას, ხვალ ყველაფერი გვეცოდინება.

"აინტრახტი" ძლიერი გუნდია, მათთან მარტივი დაპირისპირება არ გველოდება, ისინი ფიზიკურად კარგად არიან მომზადებულები და კომპაქტურად თამაშობენ, ცხადია, გერმანელებს ევროსარბიელზე გამოცდილებაც უმაგრებთ ზურგს, მათ ხომ გასულ წელს ევროპის ლიგა მოიგეს. ჩემპიონთა ლიგაზე ყველა მატჩი გადამწყვეტია, ჩემმა მოთამაშეებმა იციან, რაც უნდა გააკეთონ" - განაცხადა სპალეტიმ.

"ნაპოლი" 62 ქულით ლიდერია და უახლოესი მდევარი "ინტერი" 18 ქულით ჩამოიტოვა, რომელიც ხვალ "უდინეზეს" უმასპინძლებს. სპალეტის გუნდი 22 თებერვალს ჩემპიონთა ლიგის პირველ 1/8-ფინალურ მატჩში ფრანკფურტში "აინტრახტს" დაუპირისპირდება, 25 თებერვალს კი გასვლაზე "ემპოლის" შეხვდება.