ღიმილის მომგვრელია, რომ „ქართული ოცნება“ „ხალხის ძალის“ მიერ მომზადებულ კანონპროექტებს ვენეციის კომისიაში აგზავნის, სჯობს, „გოსდუმაში“ გააგზავნონ, რადგან რუსული სულისკვეთების კანონია, – ამის შესახებ პარტია „მოქალაქეების“ ერთ-ერთმა ლიდერმა, ალეკო ელისაშვილმა საქართველოს პირველ არხს განუცხადა.
მისივე თქმით, ეროვნული ღირსების ამბავია, რომ ეს კანონი ასეთი ამაზრზენი ფორმითა და შინაარსით არ უნდა გავიდეს.
„უცნაურია, რომ „ქართული ოცნება“ ამ კანონპროექტებს ვენეციის კომისიაში აგზავნის. სჯობდა, „გოსდუმასა“ და „სავეცკფედერაციაში“ გაეგზავნათ, რადგან რუსული სულისკვეთების კანონია. ეროვნული ღირსების ამბავია, რომ ეს კანონი ასეთი ამაზრზენი ფორმითა და შინაარსით არ უნდა გავიდეს. ცოტა ღიმილის მომგვრელია, რომ ვენეციის კომისიაში აგზავნიან. „გოსდუმაში“ გააგზავნონ, სჯობს. FARA სხვა კანონია. საქართველო ერთი დაცემინება ქვეყანაა და უკვე ჩათვალეს, რომ ამერიკა ვართ, გამართული დემოკრატიით და ინსტიტუტებით? კონტექსტსა და სახელმწიფოს ხომ უნდა მიხვდნენ, სად ხარ, რა ეტაპზე ხარ? ამერიკაში, რამდენიმე შტატში სიკვდილით დასჯაა და მსჯავრდებულებს ელექტროსკამზე სვამენ და ჩვენც ასე გავაკეთოთ? ამდენი დრო და ენერგია მავნებლობაში იხარჯება“, – განაცხადა ალეკო ელისაშვილმა.
