არ მაინტერესებს მისი განცხადებები - ასე ეხმაურება ,,ერთიანი ნაციონალური მოძრაობის" ლიდერი ხატია დეკანოიძე ვანო მერაბიშვილის სკანდალურ ინტერვიუს.
როგორც დეკანოიძე ამბობს, მსგავსი განცხადებები აზიანებს სერიოზულ საპროტესო განწყობას და ამაზე პარტიის ლიდერშიფი უფრო მკვეთრ განცხადებას გააკეთებს.
"მე არ ვიცი, რომ უკრაინის სიყვარულში ან გაკეთებულ საქმეში უკრაინაში საერთოდ ვინმე შემეჯიბროს. არ მაინტერესებს მისი განცხადებები, არ მგონია, რომ იმ ახალგაზრდებს, ვინც დგანან და იდგნენ, აინტერესებდეთ მისი განცხადებები და გავიმეორებ იგივეს, რაც თქვენ გითხარით არაერთხელ, მსგავსი განცხადებები აზიანებს სერიოზულ საპროტესო განწყობას, როდესაც პროპაგანდას ვაძლევთ საკვებს. ეს მნიშვნელოვანია, უნდა გაითავისოს ყველამ და ვფიქრობ, რომ ამასთან დაკავშირებით, პარტიის ლიდერშიფი უფრო მკვეთრ განცხადებას გააკეთებს და უნდა გააკეთოს. პროპაგანდას რაც აძლევს საკვებს ყველაფერი მუშაობს ,,ქართული ოცნების" სასარგებლოდ, მნიშვნელოვანია, ძალიან მკაცრი განცხადებები,თუ რასთან გვაქვს საქმე, მათ შორის პარტიის ლიდერშიფის მხრიდან, - ამბობს ხატია დეკანოიძე.
ცნობისთვის, ვანო მერაბიშვილმა უკრაინულ მედიასთან მიცემულ სკანდალურ ინტერვიუში ცეცხლი გაუხსნა ენმ-ს იმ ლიდერებს, რომლებიც ამ დრომდე პარტიაში რჩებიან. მან პირდაპირ თქვა, რომ პარტიაში ახლა მოვიდნენ პატრიოტი ლიდერები, რომლებიც რადიკალურად შეცვლიან ოპოზიციაში სურათს.
