„ჟანგბადის მოწოდებისა და მოხმარების ინტენსივობა ძალიან გაზრდილია. ამ გაზრდილი მოთხოვნის დასაკმაყოფილებლად, როგორც იცით, ეკონომიკის სამინისტრო მუშაობს და სხვადასხვა ქვეყნიდან ხდება ჟანგბადის იმპორტი," - განაცხადა დღეს, 31 აგვისტოს, ჯანმრთელობისა და სოციალური დაცვის მინისტრის პირველმა მოადგილე თამარ გაბუნიამ.
მისივე თქმით ლოჯისტიკური პროცესი ძალიან დატვირთულია, თუმცა ჯერჯერობით ჟანგბადის მიწოდებაში პრობლემა ერთ კლინიკასაც არ შექმნია.
„ჩვენ ვთხოვთ კლინიკებს, რომ გამოიყენონ ჟანგბადის რაციონალური გამოყენების რეკომენდაციები, რასაც ჯანმრთელობის მსოფლიო ორგანიზაცია გასცემს. ვინაიდან იყო შემთხვევები, როდესაც ჟანგბადის სისტემა იყო გახსნილი, იკარგებოდა ჟანგბადი და პაციენტი მას ვერ იყენებდა. ასეთი ტიპის ხარვეზები რომ აღმოიფხვრას, ჩვენ მუდმივად გვაქვს კომუნიკაცია კლინიკებთან," - განაცხადა გაბუნიამ.
შეგახსენებთ: რამდენიმე დღის წინ, გავრცელდა ინფორმაცია, რომ ქვეყანაში ჟანგბადის დეფიციტი იყო და ამის შესახებ ჯანდაცვის მინისტრმა კოლეგები ე.წ. შიდა ჩატში გააფრთხილა.
