ფინეთი დღეს ნატო-ს წევრი 31-ე ქვეყანა გახდება. პროცედურების თანახმად, ბრიუსელში, ფინეთის საგარეო საქმეთა მინისტრი ოფიციალურ დოკუმენტს აშშ-ის სახელმწიფო მდივანს, ენტონი ბლინკენს გადასცემს. საბოლოოდ კი, ქვეყნის დროშა ნატო-ს შტაბ-ბინაში საფრანგეთისა და ესტონეთის დროშებს შორის აღიმართება.
ფინეთმა ნატო-ში ინტეგრირება რუსეთ-უკრაინის ომის დაწყების შემდეგ გადაწყვიტა, ალიანსში გაწევრიანება კი, ქვეყნისთვის ნეიტრალიტეტის დასასრულს გულისხმობს.
იმის მიუხედავად, რომ თურქეთი დიდი ხნის განმავლობაში ნატო-ში ფინეთის გაწევრიანების წინააღმდეგი იყო, უკრაინის ომის ფონზე, ფინეთმა ისტორიაში ყველაზე სწრაფად მოახერხა ჩრდილოატლანტიკურ ალიანსში ინტეგრირება.
მოსკოვში აცხადებენ, რომ ამ პროცესის საპასუხოდ, ქვეყანა გააძლიერებს სამხედრო შესაძლებლობებს დასავლეთ და ჩრდილო-დასავლეთ რეგიონებში.
