რუსეთის ეროვნული უსაფრთხოების საბჭოს მდივანს, ნიკოლაი პატრუშევსა და გენშტაბის უფროსს, ვალერი გერასიმოვს პუტინის წინააღმდეგ, სავარაუდოდ, უკრაინაში საომარი მოქმედებების დივერსიისთვის გეგმა ჰქონდათ და მის განხორციელებას 5 მარტამდე ფიქრობდნენ, მაშინ, როდესაც პუტინი, სავარაუდოდ, ქიმიოთერაპიის მორიგ კურსს დაიწყებდა და საომარ მოქმედებებზე გავლენის შესაძლებლობა აღარ ექნებოდა, – ამის შესახებ საუბარია პენტაგონისთვის განკუთვნილ გასაიდუმლოებულ დოკუმენტებში, რომელიც „ვაის ნიუსისთვის“ გახდა ხელმისაწვდომი.
„წყაროს ცნობით, „იერიშის“ გეგმა… რუსეთის ეროვნული უშიშროების საბჭოს მდივნის, ნიკოლაი პატრუშევისა და რუსეთის გენერალური შტაბის უფროსის, ვალერი გერასიმოვის მიერ შემუშავებული სტრატეგია იყო პუტინის საბოტაჟისთვის“. წყარომ 22 თებერვალს მიანიშნა, რომ, სავარაუდოდ, გერასიმოვი გეგმავდა, გაეგრძელებინა ძალისხმევა საბოტაჟისთვის. წყარო აღნიშნავს, რომ გერასიმოვი პირობას დებდა, „ჩაეგდო“ ე.წ. სპეციალური სამხედრო ოპერაცია 5 მარტისთვის, მაშინ, როდესაც პუტინი, სავარაუდოდ, აპირებდა ქიმიოთერაპიის მორიგი კურსის დაწყებას და არ ექნებოდა შესაძლებლობა, გავლენა ექონია საომარ მოქმედებებზე“, – ვკითხულობთ დოკუმენტში.
მედიის ინფორმაციით, დაზვერვის ჩანაწერებიდან ირკვევა, რომ ამ მოსაზრების გავრცელების ავტორი უკრაინელი მაღალჩინოსანია, რომელსაც, თავის მხრივ, კრემლის მაღალჩინოსნებთან კავშირში მყოფი საკუთარი წყარო ჰყავს. ამ დოკუმენტებში არსად არის ნახსენები, რომ ამ მოსაზრების ჭეშმარიტებას აშშ-ის დაზვერვაც ადასტურებს, თუმცა დაზვერვის სააგენტომ, რომელმაც ეს ვარაუდი მიყურადების დროს მოისმინა, საჭიროდ ჩათვალა, ინფორმაცია პენტაგონის ხელმძღვანელობისთვის ეცნობინებინა.
