„ვივამედის“ კლინიკური დირექტორის, ზურაბ ჩხაიძის განცხადებით, საქართველოს ყოფილი პრეზიდენტის, მიხეილ სააკაშვილის ჯანმრთელობის მდგომარეობა სტაბილურია.
ჩხაიძის განცხადებით, სააკაშვილი ძირითადად კვლავ სიმპტომურ მკურნალობაზე იმყოფება და კლინიკის მიერ შეთავაზებული მკურნალობა ნაკლებად სრულდება.
„ბოლო პერიოდში განსაკუთრებული ცვლილება დინამიკაში არ მომხდარა. ჩვენი შეთავაზებული მკურნალობა, დანამატები და ა.შ., ნაკლებად სრულდება და ძირითადად არის სიმპტომურ მკურნალობაზე. მოგეხსენებათ, ყოველთვის ვაწარმოებთ კვლევის შედეგების მონიტორინგს პაციენტის დაავადების მიმდინარეობის დროს. ამ კონკრეტულ შემთხვევაშიც, პერიოდულად ყოველთვის ხდებოდა ლაბორატორიული მონაცემების გადამოწმება და ეს პროტოკოლის შესაბამისად კეთდება. მაისში გაკეთებული ჰქონდა აღნიშნული კვლევა მძიმე მეტალების შესახებ. არა იმიტომ, რომ რაიმე ეჭვი იყო, ეს შედიოდა კვლევის პაკეტში, მისი დაავადებიდან გამომდინარე. ეს კვლევა ჩვენ მიერ იყო შესრულებული და გარკვეული დროის შემდეგ მოხდა გადამოწმება. გაიგზავნა გერმანიის ერთ-ერთ ლაბორატორიაში და იქიდან მივიღეთ შესაბამისი დასკვნა, რომ მეტალების შემადგენლობა სისხლში არის ნორმის ქვემოთ. აქ ინტოქსიკაციაზე არ იყო საუბარი“, – აღნიშნა ზურაბ ჩხაიძემ.
კითხვაზე, რამდენს იწონის მიხეილ სააკაშვილი, ჩხაიძემ განაცხადა, რომ „ექიმების თვითმიზანი არ არის წონის კონტროლი, რადგან ამაზე პაციენტის რეაქცია არაერთგვაროვანია“.
„მოდით, წონაზე ნუ გავამახვილებთ ყურადღებას. პერიოდულად აღენიშნება ტემპერატურა, მაგრამ მაინც რჩება ნორმის ფარგლებში. კვებას რაც შეეხება, გრძელდება 400-500 კილოკალორიის ფარგლებში, მეტი არაფერი. ჩვენი თვითმიზანი არ არის წონის კონტროლი, რადგან პაციენტის რეაქციაც ამაზე არაერთგვაროვანია, ამიტომ, როდესაც თვითონ გადაწყვეტს, მაშინ მოხდება მისი აწონვა“, – განაცხადა ზურაბ ჩხაიძემ.
რაც შეეხება კითხვას, სტრასბურგში სააკაშვილის საქმესთან დაკავშირებით ადვოკატებმა „ვივამედის“ კლინიკიდან დამატებითი დოკუმენტები ხომ არ გამოითხოვეს, ჩხაიძემ განაცხადა:
„არა, ჩვენთვის რაიმე დამატებითი კვლევა არ ყოფილა ამის შესახებ“, – განაცხადა „ვივამედის“ კლინიკურმა დირექტორმა.
